စစ်ကောင်စီမတရားချိတ်ပိတ်ထားသည့် NLD ပါတီ အမတ်နေအိမ်မှစတင်လောင်ခဲ့သောကြောင့် ရှို့မီးဖြစ်နိုင်ဟု ဒေသခံများသုံးသပ်
ရန်ကုန်မြို့ သာကေတမြို့နယ်(၆)ရပ်ကွက်ရှိ အာဏာသိမ်းစစ်ကောင်စီ မတရားချိတ်ပိတ်ထားသော NLDပါတီ လွှတ်တော်ကိုယ်စားလှယ်၏ နေအိမ်မှ မီးစတင်လောင်ကျွမ်းခဲ့ရာ ရှို့မီးဖြစ်နိုင်ကြောင်း ဒေသခံများက သုံးသပ်ထားသည်။
“ပိတ်ထားတဲ့အိမ်လို့တော့ ကြားတယ်။ အဲဒီ့အိမ် ကစတာဆိုရင်တော့ ရှို့မီးပဲဖြစ်မှာပေါ့”ဟု ဒေသခံတစ်ဦးက ပြောသည်။
မေလ ၄ ရက် ညနေ ၅ နာရီခွဲခန့်တွင် သာကေတမြို့နယ် (၆)ရပ်ကွက် အောင်သုခ ၂၃ လမ်းရှိ နေအိမ်မီးလောင်ခဲ့ခြင်းဖြစ်ပြီး မီးသတ်မှ Level 2 အဆင့် မီးငြှိမ်းသတ်ယာဉ်များစေလွှတ်မီးငြှိမ်းသတ်ခဲ့ရသည်။
နေအိမ်ခြောက်လုံးခန့် မီးလောင်ဆုံးရှုံးခဲ့ကြောင်း ယင်းနေရာသို့သွားရောက်ကူညီသည့် လူမှူကူညီရေးအသင်းများကပြောကြားထားပြီး မီးလောင်မှု အကြောင်းရင်းနှင့်ဆုံးရှုံးမှုတန်ဖိုး မသိရသေးပေ။
“ဖြူဖြူစင်စင်ချွေးနည်းစာနဲ့ကာလကြာရှည် ပင်ပင်ပန်းပန်းတည်ဆောက်ခဲ့ရတယ်။မကြာမကြာ Google Maps ကနေ သတိရလို့ကြည့်ဖြစ်တယ်။ မနေ့ညကတောင်အိမ်အတွင်း ပုံလေးပြန်ကြည့်ဖြစ်တယ်။ဒါပေမယ့်မငိုကြနဲ့ သမီးတို့။အညာမြေထက်စာရင်အနန့်ပါထက်စာရင် ပဇီကြီးထက်စာရင် အတူတူပြာချခံရတဲ့အိမ်နီးနားချင်းတွေထက်စာရင်၊ ဖေဖေတို့ကတော်သေးတယ်။အရင်းခံကတော့ မအလပဲအရေးတော်ပုံအောင်ရမည်။”ဟု NLD လွှတ်တော်အမတ်ကျော်ဇင်ဦးက မီးလောင်သွားသည့် နေအိမ်ပုံနှင့်အတူ ၎င်း၏ဖေ့စ်ဘွတ်ခ်၌ ရေးသားထားသည်။
ယင်းမီးလောင်မှုကြောင့် မီးဘေးသင့်အိမ်ထောင်စု ၁၅ စုရှိပြီး မီးဘေးသင့်ပြည်သူ ၅၀ကျော်ရှိခဲ့ကြောင်း ၎င်းက ရေးသားထားသည်။
စစ်ကောင်စီသည် ရန်ကုန်တိုင်း ခရမ်းမြို့နယ်၌ ခရမ်းPDF ခေါင်းဆောင်ကိုမီးပွား၏ မတရားချိတ်ပိတ်ထားသည့် နေအိမ်ကို ဧပြီ ၁၅ ရက်က မီးရှို့သည့်ဖြစ်စဉ်လည်းရှိခဲ့သည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)