မင်းကင်းမြို့နယ်၊ ပိက္ခယားရွာကိုစစ်ကောင်စီတပ်ကယမန်နေ့ ညနေပိုင်းကလေကြောင်းမှဗုံးကြဲတိုက်ခိုက်ခဲ့ရာ ကလေးနှစ်ဦးအပါအဝင် ခြောက်ဦးသေဆုံးပြီး၊ ၁၁ဦး ဒဏ်ရာရရှိခဲ့ကြောင်း ဒေသခံများကပြောသည်။
ပိက္ခယားရွာကို မေလ ၄ ရက်မွန်းလွဲ(၁)နာရီခန့်တွင်တိုက်လေယာဉ်ဖြင့်ဗုံးကြဲတိုက်ခိုက်ခြင်းဖြစ်ကြောင်းမင်းကင်းမြို့ခံတစ်ဦးကပြောသည်။
“အရပ်သားတွေချည်းသေဆုံးတာပါ။ကလေးက ၄ နှစ်နဲ့ ၇နှစ်ရွယ်နှစ်ဦးပါတယ်။ ကျန်တာကလူကြီးတွေပါ”ဟုအဆိုပါ မင်းကင်းမြို့ခံကပြောသည်။
လေကြောင်းသတိပေးချက်ရရှိ၍ပုန်းအောင်းနေကြစဥ်ကြောက်လန့်ပြီးထွက်ပြေးသူအချို့သည် စစ်ကောင်စီ တိုက်လေယာဉ်က ကျဲချသောပေါင် ၅၀၀ ဗုံးပေါက်ကွဲမှုကြောင့် သေဆုံး၊ဒဏ်ရာရရှိခဲ့ခြင်းဖြစ်ကြောင်းဒေသခံအချို့ကပြောသည်။
“အများစုကပုန်းနေတာပါ။အခုကကျတော့ပေါင် ၅၀၀ ဗုံးဆိုတော့ မလွတ်လောက်ဘူးဆိုပြီး လန့်ပြီး ထွက်ပြေးကြရင်း ထိကုန်တာ။ မြေပြင်တိုက်ပွဲမရှိခဲ့ဘဲ ပစ်တာပါ”ဟု မင်းကင်းမြို့နယ် ပြည်သူ့ကာကွယ်ရေးတပ်ဖွဲ့ ဝင်တစ်ဦးကပြောသည်။
စစ်ကောင်စီတပ်ကျဲချသောဗုံးအမျိုးအစားကို People’s Spring ကသီးခြားအတည်မပြုနိုင်သေးပါ။
ယနေ့(မေလ ၅ရက်)တွင် မြေပြင်အခြေအနေငြိမ်သက်နေပြီး စစ်ကောင်စီစစ်ကြောင်းလှုပ်ရှားမှုလည်းမရှိကြောင်း ဒေသခံများကပြောသည်။ ဒဏ်ရာရသူ ၁၁ဦးသည် ဆေးကုသမှုခံယူနေရဆဲဖြစ်သည်။
ယခုနောက်ပိုင်းစစ်ကောင်စီတပ်သည် မြေပြင်တိုက်ပွဲများတွင်အထိနာလာသဖြင့် အရပ်သားပစ်မှတ်များကို ဦး တည်ပြီး လေကြောင်းတိုက်ခိုက်မှုများအဆက်မပြတ်ပြုလုပ်နေသည်။ဧပြီ ၁၁ရက်က ကန့်ဘလူမြို့နယ်၊ပဇီကြီး ရွာကို လေကြောင်းမှ တိုက်ခိုက်ခဲ့ရာ ဒေသခံ ၁၇၀ခန့်သေဆုံးခဲ့သည်။ထို့နောက်ပိုင်းတွင် ရှမ်းပြည်နယ် ဖယ်ခုံနှင့် ချင်းပြည်နယ် ဟားခါးမြို့၊မင်းတပ်မြို့၊ ထန်တလန်မြို့၊ စစ်ကိုင်းတိုင်း ဟုမ္မလင်းနှင့် ဖောင်းပြင်မြို့၊ ကရင်ပြည်နယ် မြဝတီမြို့တို့တွင်လည်းစစွတပ်က လေကြောင်းမှ တိုက်ခိုက်မှုများဆက်တိုက်ပြုလုပ်ခဲ့သည်။
မြန်မာစစ်တပ်သည် အပြစ်မဲ့ပြည်သူများအား လေကြောင်းမှ အကြိမ်ကြိမ်ဗုံးကြဲတိုက်ခိုက်နေခြင်းအတွက် နိုင်ငံတကာ၏အရေးယူမှုကို မခံရသရွေ့ စစ်တပ်မှ ပြည်သူများအပေါ် သတ်ဖြတ်နေခြင်းကို ရပ်တန့်နိုင်မည်မဟုတ်ကြောင်း သံအမတ်ကြီးဦးကျော်မိုးထွန်းက ပြောကြားထားသည်။
နယူးယောက်မြို့၊ ကုလသမဂ္ဂဌာနချုပ် လုံခြုံရေးကောင်စီ၏ ရေရှည်ငြိမ်းချမ်းရေး တည်ဆောက်ရေး ခေါင်းစဉ်အောက်မှ ငြိမ်းချမ်းရေးရေရှည်တည်တံ့ရေးအတွက် ယုံကြည်မှုတည်ဆောက်ရေးဆိုင်ရာ ဝန်ကြီးအဆင့် ဆွေးနွေးပွဲကို မေလ ၃ ရက်တွင် ပြုလုပ်ခဲ့ရာ ယင်းဆွေးနွေးပွဲ၌ ကုလသမဂ္ဂဆိုင်ရာမြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်း တက်ရောက်မိန့်ခွန်း ပြောကြားခဲ့ခြင်းဖြစ်သည်။
ကုလလုံခြုံရေးကောင်စီထံမှမြန်မာပြည်သူများဘာကိုမျှော်လင့်နိုင်မည်လဲဟုလည်းသံအမတ်ကြီးကမေးခွန်းထုတ်ခဲ့သည်။
