▪︎စစ်ကောင်စီတပ် ပစ်ခတ်မှုကြောင့် (၄)နှစ်အရွယ်ကလေးငယ်တစ်ဦး ကျည်ထိမှန်ထား
စစ်ကိုင်းတိုင်း၊ ခင်ဦးမြို့နယ်တွင် မုန်ခါမုန်တိုင်းတိုက်နေချိန်မှာပင် စစ်ကောင်စီတပ်စစ်ကြောင်းထိုးလာသည့်အန္တရာယ်ကြောင့် ဒေသခံပြည်သူသုံးထောင်ကျော်မှာ ထွက်ပြေးတိမ်းရှောင်နေရပြီး ၎င်းတို့ပစ်ခတ်မှုကြောင့် (၄)နှစ်အရွယ်ကလေးငယ်တစ်ဦး ကျည်ထိမှန်ထားကြောင်း ဒေသတွင်းသတင်းရင်းမြစ်များက ပြောသည်။
ယနေ့ (မေလ ၁၄ရက်)နံနက်၆ နာရီခန့်က ခင်ဦးမြို့နယ်၊ အင်းပတ်ကွေ့ရှိ စစ်ကောင်စီတပ်နှင့် ရွာသစ်ကုန်းရွာရှိ ပျူစောထီးများသည် ချမ်းသာကုန်းနှင့် အင်းပတ်ကျေးရွာအတွင်းသို့ လက်နက်ကြီး၊ငယ်များ ပစ်ခတ်ဝင်ရောက်ခဲ့သည်။
![(ထွက်ပြေးတိမ်းရှောင်နေရသော ခင်ဦးနယ်ပြည်သူများအား တွေ့ရစဥ်။ ဓာတ်ပုံ - ခင်ဦးမြို့နယ်သတင်းမှန်ပြန်ကြားရေး)](https://i0.wp.com/www.ludunwayoo.com/wp-content/uploads/2023/05/347126933_193208046973512_3678768637312359797_n.jpg?resize=720%2C540&ssl=1)
ထိုသို့ပစ်ခတ်မှုကြောင့် အင်းပတ်ကျေးရွာမှ (၄)နှစ်အရွယ် ကလေးငယ်တစ်ဦး ကျည်ထိမှန်ကာ ဆေးကုသမှုခံယူနေရကြောင်း၊ ထို့အပြင် ကျေးရွာအတွင်း နေအိမ်များမှ စားနပ်ရိက္ခာများ အဓမ္မလုယူသွားကြောင်း ခင်ဦးမြို့နယ်သတင်းမှန်ပြန်ကြားရေးအဖွဲ့က ပြောသည်။
“ကလေးတစ်ယောက် ပေါင်ရင်းကျည်ထိမှန်ခဲ့တာ ပြည်သူ့ရဲဘော်တွေက အချိန်မီဆေးခန်း ပို့ဆောင်နိုင်ခဲ့ပါတယ်။”ဟုFarmer Heroes Khin U အဖွဲ့က ပြောသည်။
![(ထွက်ပြေးတိမ်းရှောင်နေရသော ခင်ဦးနယ်ပြည်သူများအား တွေ့ရစဥ်။ ဓာတ်ပုံ - ခင်ဦးမြို့နယ်သတင်းမှန်ပြန်ကြားရေး)](https://i0.wp.com/www.ludunwayoo.com/wp-content/uploads/2023/05/346834773_233992149238996_3310901384698162704_n.jpg?resize=720%2C540&ssl=1)
အဆိုပါ စစ်ကောင်စီတပ်ကြောင့် ခင်ဦးမြို့နယ် အနောက်ခြမ်းရှိ အင်းပတ်ကျေးရွာ၊ ချမ်းသာကုန်းကျေးရွာနှင့် ကုန်းသာရွာ စသည့် ကျေးရွာများမှ ဒေသခံသုံးထောင်ကျော်မှာ မိုခါမုန်းတိုင်းကြောင့် ဖြစ်ပေါ်လာသော မိုးထဲ၊လေထဲမှာပင် ထွက်ပြေးတိမ်းရှောင်နေရကြောင်း ခင်ဦးမြို့နယ်သတင်းမှန်ပြန်ကြားရေးအဖွဲ့က ပြောသည်။
စစ်ကြောင်းထိုးနေသော စစ်ကောင်စီတပ်အား ဒေသကာကွယ်ရေးအဖွဲ့က အပြန်လမ်းတွင် မိုင်းများဖြင့် ဖောက်ခွဲတိုက်ခိုက်ခဲ့ရာ အဆိုပါ စစ်ကောင်စီတပ်မှာ ရွာသစ်ကုန်းနှင့် အင်းပတ်ကွေ့သို့ ပြန်လည်ဝင်ရောက်သွားကြောင်း Farmer Heroes Khin U အဖွဲ့က ပြောသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)