ရခိုင်ပြည်နယ် ရသေ့တောင်မြို့နယ်ရှိ ဒုံးပိုက်ကျေးရွာ ဓမ္မာရုံ၌ မုန်တိုင်းရှောင်နေစဉ် ဓမ္မာရုံပြိုကျ၍ လူ ၁၃ဦး သေဆုံးခဲ့ကြောင်း ရသေ့တောင်ဒေသခံက ပြောသည်။
“ဒုံးပိုက်ကျေးရွာမှာ မုန်တိုင်းထန်တုန်းက ဓမ္မာရုံပြိုကျတဲ့အတွက် ၁၃ဦး သေတယ်။ ကျားက ၄ယောက်၊ မက ၉ယောက် ၊ မ ၉ယောက်ထဲမှာ ကလေးငယ် တစ်ဦးပါတယ်”ဟု ၎င်းက ပြောသည်။ ဒဏ်ရာရသူများနှင့်အခြား သေဆုံးထိခိုက်မှုများ ရှိ၊မရှိ ဆက်လက်စုံစမ်းနေဆဲ ဖြစ်သည်။
ဒုံးပိုက်ကျေးရွာသည် အငူမော်မှ မောင်တောမြို့သို့သွားသည့်လမ်းမပေါ်တွင် တည်ရှိသည့် ကျေးရွာဖြစ်သည်။
ရခိုင်ဒေသခံတစ်ဦးကလည်း မုန်တိုင်းကြောင့် ရသေ့တောင်မြို့နယ် တစ်ခုတည်း၌ လူဦးရေ ၁၆ဦးထက်မနည်း သေဆုံးခဲ့သည်ဟု လူမှုကွန်ရက်၌ ရေးသားထားသည်။
မိုခါမုန်တိုင်းကြောင့် ရခိုင်ပြည်တွင် သေဆုံးသူ အရေအတွက် ထပ်တိုးလာနိုင်ကြောင်း ၊ နယ်ဘက်ဒေသများနှင့် အဆက်အသွယ်မရသေး၍ အသေးစိတ်အခြေအနေများ မသိရသေးကြောင်း ဒေသခံအချို့က အသိပေးထားသည်။
ဆိုင်ကလုန်းမုန်တိုင်း မိုခါဝင်ရောက်စဉ် ရခိုင်ပြည်နယ်ရှိ မြို့နယ်အများအပြား အိုးအိမ်ပျက်စီးမှုများ ရှိခဲ့ပြီး ဆက်သွယ်ရေးပြတ်တောက်မှု ဖြစ်ခဲ့၍ အသေအပျောက်စာရင်းများကို လတ်တလော အချိန်အထိ အတည်မပြုနိုင်သေးပေ။
စစ်တွေနှင့်မာန်အောင်တွင်လည်း လူသေဆုံးမှု ရှိကြောင်း ဒေသတွင်း သတင်းဌာနများက ဖော်ပြသည်။
