တနင်္သာရီတိုင်း ထားဝယ်မြို့နယ် မောင်မယ်ရှောင်ကျေးရွာအနီးရှိ စစ်ကောင်စီ ၏ ဘုရားမဲစစ်ဆေးရေးဂိတ်ကို PDF ပူးပေါင်းတပ်က ဝင်ရောက်ပစ်ခတ်တိုက်ခိုက်ခဲ့ကြောင်း ထားဝယ်ခရိုင် PDFတပ်ရင်း (၁)မှ တာဝန်ရှိသူတစ်ဦးက ပြောသည်။
စစ်ကောင်စီ၏ ခမရ(၄၀၆)တပ်ရင်းမှ စစ်ကောင်စီတပ်သားများ နေရာယူထားသည့် ဘုရားမဲဂိတ်ကို ထားဝယ်ခရိုင်၊တပ် ရင်း(၁)မ၊ တပ်ခွဲ(၂)၊ DGRF၊ ဧဒင်မှူး၊ Aline Force အဖွဲ့များပူးပေါင်းပြီး မေလ ၁၄ ရက်နံနက် ၈ နာရီခွဲမှ ၉ နာရီခွဲခန့်အထိ ၁နာရီကြာ အပြန်အလှန်ပစ်ခတ်တိုက်ခိုက်ခဲ့ခြင်းဖြစ်သည်။
“အခုက သူတို့ဖက်က အမြဲတိုက်ခိုက်ခံနေရတော့ အဆင်သင့် အနေအထားမှာ ရှိနေပါတယ်”ဟု ဘုရားမဲစစ်ဆေးရေးဂိတ်မှ စစ်ကောင်စီတပ်သားများ၏ အခြေအနေကို ထားဝယ်ခရိုင်တပ်ရင်း(၁)မှ တာဝန်ရှိသူတစ်ဦးက ရှင်းပြသည်။
ထို့အပြင် အဆိုပါစစ်ဆေးရေးဂိတ်ကို ဒေသအခြေစိုက် တော်လှန်ရေးတပ်ဖွဲ့များ၏ မကြာခဏတိုက်ခိုက်ခံရမှုကြောင့် စစ်ကောင်စီက ရေဖြူအခြေစိုက် ခမရ(၄၀၆)မှ စစ်သား ၃၀မှ ၅၀ခန့်အထိ ထပ်တိုးအစောင့်ချပေးထားသည်ကို တွေ့ရသည်ဟု ၎င်းတာဝန်ရှိသူက ဆိုသည်။
စစ်ဆေးရေးဂိတ်အား တိုက်ခိုက်မှုတွင် စစ်ကောင်စီတပ်မှ လက်နက်ကြီး၊ လက်နက်ငယ်များဖြင့် တရစပ်ပြန်ပစ်ခတ်ခဲ့သဖြင့် ပြည်သူ့ကာကွယ်ရေးပူးပေါင်းအဖွဲ့မှ ရဲဘော်နှစ်ဦး ဒဏ်ရာ(မစိုးရိမ်ရ)ရရှိခဲ့ကာ စစ်ကောင်စီတပ်မှ နှစ်ဦးသေဆုံးပြီး သုံးဦး ဒဏ်ရာရရှိခဲ့ကြောင်း ထားဝယ်ခရိုင် တပ်ရင်း(၁)က အသိပေးထားသည်
