မြန်မာစစ်တပ်သို့ လက်နက်တင်ပို့မှု ရပ်တန့်ရေးနှင့် ပြစ်မှုကျူးလွန်ထားသော စစ်တပ်ခေါင်းဆောင်များကို အပြည်ပြည်ဆိုင်ရာရာဇဝတ်ခုံရုံး (ICC)ထံ လွှဲပြောင်းရေးတို့ ဆောင်ရွက်ပေးရန် ကုလသမဂ္ဂလုံခြုံရေးကောင်စီကို သံအမတ်ကြီး ဦးကျော်မိုးထွန်းက တောင်းဆိုသည်။
ကုလသမဂ္ဂလုံခြုံရေးကောင်စီသည် မြန်မာ့အရေး Arria-Formula အစည်းအဝေးကို ယမန်နေ့တွင် ကျင်းပပြုလုပ်ရာ ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်းက လုံခြုံရေးကောင်စီ ဆုံးဖြတ်ချက်အဆို “၂၆၆၉” ၏ နောက်ဆက်တွဲအရေးယူမှုကို ချက်ချင်းဆောင်ရွက်ရန် လိုအပ်နေကြောင်းနှင့် လုံခြုံရေးကောင်စီအနေဖြင့် ကုလသမဂ္ဂပဋိဉာဏ်စာတမ်း၏ အခန်းခုနစ်အောက်မှ အဓိပ္ပါယ်ရှိသည့် အရေးယူဆောင်ရွက်မှုပြုလုပ်ရန်လိုကြောင်း ထောက်ပြခဲ့သည်။
ပြီးခဲ့သည့် ၂၀၂၂ ဒီဇင်ဘာက လုံခြုံရေးကောင်စီ ဆုံးဖြတ်ချက် “၂၆၆၉” အတည်ပြုချမှတ်ခဲ့ပြီးနောက်တွင်ပင် စစ်တပ်သည် အစုလိုက်အပြုံလိုက် သတ်ဖြတ်မှုများကို အဖန်တလဲလဲ ကျူးလွန်လျက်ရှိပြီး ၂၀၂၃ ဧပြီ ၁၁ရက်က လူပေါင်း ၂၀၀ နီးပါးကို သတ်ဖြတ်ခဲ့သည့်ဖြစ်စဉ်ကို လတ်တလော ကျူးလွန်ထားကြောင်း သံအမတ်ကြီးက ကောင်စီသို့ တင်ပြသည်။
ယင်းသို့ အကြိမ်ကြိမ် ကျူးလွန်ခဲ့သော်လည်း ဒဏ်ခတ်အရေးယူခံရခြင်းမှ လွတ်မြောက်နေပြီး နိုင်ငံတကာအသိုက်အဝန်းမှ စစ်တပ်အပေါ် အရေးယူခြင်း မရှိသေးသရွေ့ စစ်တပ်သည် ပြည်သူများအား သတ်ဖြတ်မှုကို ရပ်တန့်မည် မဟုတ်ကြောင်း ဆက်ပြောသည်။
ထို့အပြင် စစ်တပ်သည် လူသားချင်းစာနာမှုအကူအညီပေးရေးမူများကို လေးစားလိုက်နာမှုမရှိဘဲ မလိုအပ်သော အတားအဆီးများကို ပြုလုပ်ပြီး လူသားချင်းစာနာမှု အကူအညီများကို တကယ်လိုအပ်သည့်သူများထံ ပေးပို့ခြင်းမျိုး မဟုတ်ဘဲ၊ ၎င်းတို့လက်သင့်ရာ ပေးပို့နေကြောင်း သံအမတ်ကြီးက ကောင်စီသို့ ပြောသည်။ လူသားချင်းစာနာမှုအကူအညီပေးရေးကို လက်နက်သဖွယ်အသုံးပြု၍ စစ်တပ်တရားဝင်မှုရှိရေး ဆောင်ရွက်မှုများကြောင့် လူသားချင်းစာနာမှုအကူအညီပေးရေးတွင် စိန်ခေါ်မှုများ အကြီးအကျယ် ဖြစ်စေကြောင်းလည်း သံအမတ်ကြီးက အစီရင်ခံသည်။
တစ်ဖက်တွင် အမျိုးသားညီညွတ်ရေးအစိုးရနှင့် မိတ်ဘက်များသည် လူသားချင်းစာနာ ထောက်ထားမှုဆိုင်ရာ မူဝါဒများနှင့်အညီ ပေးအပ်နေသူများအား ကာကွယ်စောင့်ရှောက်ရေးနှင့် အမှန်တကယ်လိုအပ်သူများထံသို့ ရောက်ရှိရေးကို နည်းမျိုးစုံဖြင့် ကြိုးပမ်းအကောင်အထည် ဖော်ဆောင်ရွက်လျက်ရှိပြီး နိုင်ငံတကာအသိုက်အဝန်းအနေဖြင့် အမျိုးသားညီညွတ်ရေးအစိုးရနှင့် အတူတကွ ပူးပေါင်းဆောင်ရွက်ရန် သံအမတ်ကြီးက တိုက်တွန်းသည်။
ထို့အပြင် စစ်အာဏာရှင်ရှိနေသရွေ့ လုံခြုံစိတ်ချပြီး ဂုဏ်သိက္ခာရှိစွာ မိမိဆန္ဒဖြင့် ရိုဟင်ဂျာများ နေရပ်ပြန်ရေးမှာ မည်သို့မျှဖြစ်လာမည်မဟုတ်ဘဲ အကြမ်းဖက်မှုများထပ်မံကျူးလွန်ခြင်းများပင် ခံရမည်ဖြစ်ကြောင်းနှင့် ရိုဟင်ဂျာများအပေါ် စစ်တပ်၏ကျူးလွန်မှုများအတွက် ပြန်လည်တာဝန်ခံမှုရှိရန် အမျိုးသားညီညွတ်ရေးအစိုးရမှ ကြိုးပမ်းလျက်ရှိကြောင်း ကောင်စီသို့ တင်ပြသည်။
