ဖားကန့်မြို့ ၊ မရှိကထောင်ရပ်ကွက်တွင် KTV သို့ သွားသည့် စစ်ကောင်စီတပ်မှအရာရှိအချို့လိုက်ပါလာသော ကားကို ယနေ့(မေလ ၂၃ရက်) နံနက်အစောပိုင်းတွင် ပြည်သူ့ကာကွယ်ရေးတပ်ဖွဲ့များကမိုင်းဆွဲတိုက်ခိုက်ရာကားပျက်စီးသွားပြီးကရိန်းဖြင့် ဆွဲယူသွားကြောင်းဒေသခံများကပြောသည်။
မရှိကထောင်ရပ်ကွက် ကုန်းတက်တွင် နံနက် ၁နာရီခွဲခန့်က ကားတစ်စီးမိုင်းဆွဲတိုက်ခိုက်ခံရခြင်းဖြစ်ပြီး စစ်ကောင်စီအရာရှိအချို့လိုက်ပါလာသော ကားဖြစ်ကြောင်း မိုးလင်းမှ သိရသည်ဟု ဒေသခံတစ်ဦးကပြောသည်။
“ကားကလဲကျသွားတာ။ ညဘက်ကြီးဆိုတော့ရှင်းရှင်းလင်းလင်းတော့မမြင်ရဘူး။ ပေါက်ကွဲပြီး မိနစ်အနည်းငယ်အကြာမှာ ကားတစ်စီးရောက်လာပြီး လူတွေတင်ခေါ်သွားတယ်။ နောက်နာရီဝက်လောက်အကြာမှာ ကရိန်းနဲ့ဆွဲတင်သွားတယ်”ဟု ဒေသခံတစ်ဦးကပြောသည်။
စစ်ကောင်စီတပ်အရာရှိအချို့အပါအဝင် ငါးဦးသည် KTV သို့သွားစဥ် စောင့်ကြို၍ မိုင်းဆွဲတိုက်ခိုက်ခြင်းဖြစ်သည်ဟု ဖားကန့်မြို့နယ် ပြည်သူ့ကာကွယ်ရေးတပ်ဖွဲ့ ဝင်တစ်ဦးကပြောသည်။
” စကစအရာရှိတွေပါတဲ့ AD ဗင်ကားကို မိုင်းဆွဲတာ။ ကားက တခါတည်းထိုးရပ်သွားတယ်။ မနက် ၂နာရီမှာ ကရိန်းနဲ့ ဆွဲတင်သွားတယ်” ဟု အထက်ပါ ထောက်ပို့ရဲဘော်ကလည်းပြောသည်။
အဆိုပါကားမိုင်းဆွဲတိုက်ခိုက်ခံရမှုကြောင့် ထိခိုက်သေဆုံးမှူအခြေအနေကိုမူ မသိရသေးပါ။
မရှီကထောင်ရပ်ကွက်ရှိ HAPPY KTV တွင်ပြီးခဲ့သည့် ဧပြီလ ၂၃ရက်က စစ်ကောင်စီ၏ တပ်မ ၃၃ လက်အောက်ခံတပ်ရင်းခလရ(၁၃)စစ်ကြောင်းမှူး ရောက်ရှိနေစဉ် တော်လှန်ရေးအင်အားစုများက ပစ်ခတ်ရှင်းလင်းခဲ့သည်။
