စစ်ကိုင်းတိုင်း၊ ဝက်လက်မြို့နယ်၏ ကြားကာလပညာရေးအတွက် ဦးဆောင်နေသော နဘဲပင်လှကျေးရွာရှိ ဘုန်းကြီးကျောင်းနှင့် စာသင်ဆောင်များအား စစ်ကောင်စီတပ်က ဝင်ရောက်မီးရှို့ဖျက်ဆီးသွားကြောင်း ဝက်လက်မြို့နယ်လူထုသပိတ်တိုက်ပွဲကော်မတီက ပြောသည်။
ဇွန်လ ၃ ရက်က ဝက်လက်မြို့နယ်၊နဘဲပင်လှကျေးရွာအား စစ်ကောင်စီတပ်က ဝင်ရောက်ဖျက်ဆီးမီးရှို့ခဲ့ရာ နေအိမ် ၁၀၀ကျော်၊ ဘုန်းကြီးကျောင်းဆောင် နှစ်ဆောင်နှင့် စာသင်ဆောင်တစ် ခုအား မီးရှို့ဖျက်ဆီးခဲ့သည်။
![(နဘဲပင်လှရွာရှိ ဘုန်းကြီးကျောင်းနှင့်စာသင် ဆောင်များအား မီးရှို့ဖျက်ဆီးသွားစဥ်။ ဓာတ်ပုံ-ဝက်လက်မြို့နယ်လူထုသပိတ်တိုက်ပွဲကော်မတီ)](https://i0.wp.com/www.ludunwayoo.com/wp-content/uploads/2023/06/351466052_595054455942917_1085790672532063771_n.jpg?resize=720%2C540&ssl=1)
နဘဲပင်လှကျေးရွာမှာ ကြားကာလပညာရေးအတွက် စတင်လှုပ်ရှားခဲ့သည့်နေရာဖြစ်ပြီး ယခုအချိန်အထိ ပညာရေးဆက်လက်အားကောင်းနေသော နေရာဖြစ်ကြောင်း၊ ပညာရေးအတွက် အသုံးပြုနေသော ဘုန်းကြီးကျောင်းများ၊စာသင်ဆောင် များအားလုံးကို မီးရှို့ဖျက်ဆီးခံခဲ့ရကြောင်း ဝက်လက်မြို့နယ်လူထုသပိတ်တိုက်ပွဲကော်မတီက ပြောသည်။
ထို့အပြင် စစ်ကောင်စီတပ်သည် ဒေသခံပြည်သူတစ်ဦးကိုလည်း မီးရှို့သတ်ဖြတ်သွားခဲ့ကြောင်း ဒေသခံများက ပြောသည်။
![(နဘဲပင်လှရွာရှိ ဘုန်းကြီးကျောင်းနှင့်စာသင် ဆောင်များအား မီးရှို့ဖျက်ဆီးသွားစဥ်။ ဓာတ်ပုံ-ဝက်လက်မြို့နယ်လူထုသပိတ်တိုက်ပွဲကော်မတီ)](https://i0.wp.com/www.ludunwayoo.com/wp-content/uploads/2023/06/351139177_211740481721602_8751380580307213721_n.jpg?resize=720%2C540&ssl=1)
“အသက် ၂၃နှစ်အရွယ် လူငယ်အမျိုးသား တစ်ဦးကို ခေါင်းဖြတ်ပစ်သတ်မီးရှို့ခဲ့တယ်။အသက်(၆၀)အရွယ် အမျိုးသားတစ်ဦးကိုတော့ သေနတ်နဲ့ ပေါင်ကိုပစ်ခဲ့တယ်။”ဟု ဒေသတွင်းတော်လှန်ရေးအဖွဲ့ဝင်တစ်ဦးက ပြောသည်။
ထို့အပြင် ထွက်ပြေးပုန်းရှောင်နေရသော ဒေသခံပြည်သူများအတွက် အကူအညီများလည်း လိုအပ်နေကြောင်း သိရသည်။
![(နဘဲပင်လှရွာရှိ ဘုန်းကြီးကျောင်းနှင့်စာသင် ဆောင်များအား မီးရှို့ဖျက်ဆီးသွားစဥ်။ ဓာတ်ပုံ-ဝက်လက်မြို့နယ်လူထုသပိတ်တိုက်ပွဲကော်မတီ)](https://i0.wp.com/www.ludunwayoo.com/wp-content/uploads/2023/06/351305970_644027100916120_8371838084875876449_n.jpg?resize=720%2C540&ssl=1)
ယမန်နေ့ (ဇွန်လ ၄ ရက်)တွင် ဝက်လက်မြို့နယ်အရှေ့ခြမ်း၌ စစ်ကောင်စီတပ် စစ်ကြောင်းထိုးနေ၍ စစ်ကိုင်း-ကျောက်မြောင်း ခရိုင်ချင်းဆက် လမ်းပိုင်းအား အသုံးမပြုကြရန် ဒေသတွင်း တော်လှန်ရေးအင်အားစုများက သတိပေးထားသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)