စစ်ကိုင်းတိုင်း ကောလင်းမြို့နယ်တွင် စစ်ကောင်စီတပ်က စစ်ဘေးရှောင် အရပ်သား ၁၇ဦးဖမ်းဆီးပြီး ရှစ်ဦးအား သတ်ဖြတ်သွားကာ လေးဦးမှာ သတင်းအစအနပျောက်နေကြောင်း ကောလင်းမြို့နယ်ပြည်သူ့ကာကွယ်ရေးတပ်ဖွဲ့မှ တာဝန်ရှိသူတစ်ဦးက ပြောသည်။
ကောလင်းမြို့နယ် သစ်ဖုလှတောင်၌ အထိုင်ချထားသော စစ်ကောင်စီတပ်သည် မေလ ၂၈ရက်မှ ဇွန်လ ၃ရက်အထိ ခံသာတိုက်နယ်အတွင်းရှိ ကျေးရွာများကို စစ်ကြောင်းထိုးပြီး အရပ်သားများအား ဖမ်းဆီးသတ်ဖြတ်သွားသည်ဟု သတင်းရရှိသည်။
“တောထဲမှာ စစ်ဘေးရှောင်နေတဲ့သူတွေကို သတ်သွားတာပါ။ ကျွန်တော်တို့က အဲ့နေရာကနေ ရှောင်နေဖို့ပြောတာကို စစ်ကြောင်းရောက်မလာနိုင်ဘူးဆိုပြီး ကပ်နေကြတဲ့သူတွေကို အဖမ်းခံရပြီး အသတ်ခံထားရတာ”ဟု ကောလင်းမြို့နယ်ပြည်သူ့ကာကွယ်ရေးတပ်ဖွဲ့မှ တာဝန်ရှိသူတစ်ဦးက ပြောသည်။
အရပ်သား ၁၇ဦးကို ဖမ်းဆီးခံရပြီး ငါးဦးမှာ ထွက်ပြေးလွတ်မြောက်လာခဲ့ကြောင်း၊ သတ်ဖြတ်ခံရသည့် ရှစ်ဦး၏ ရုပ်အလောင်းကို ပြန်လည်တွေ့ရှိပြီး ကျန်လေးဦးမှာ ယနေ့(ဇွန်လ ၁၀ရက်)အထိ သတင်းအစအနပျောက်နေသည်ဟု ဆိုသည်။
အဆိုပါ စစ်ကြောင်းသည် သစ်ဖုလှတောင်ရှိ ၎င်းတို့ စခန်းသို့ ပြန်ရောက်ရှိနေပြီး လတ်တလောတွင် စစ်ရေးအခြေအနေ ငြိမ်သက်နေကြောင်း သတင်းရရှိသည်။
ကောလင်းမြို့နယ် ဥမင်ကုန်းကျေးရွာတွင် ပြီးခဲ့သည့် ဇွန်လ ၄ရက်က စစ်ကောင်စီတပ်နှင့် ဒေသကာကွယ်ရေးတပ်များ တိုက်ပွဲအပြင်းအထန်ဖြစ်ခဲ့သည်။ အဆိုပါ တိုက်ပွဲတွင် စစ်ကောင်စီဘက်မှ အထိအခိုက်များခဲ့သောကြောင့် လေကြောင်းနှင့် လက်နက်ကြီးအသုံးပြုတိုက်ခိုက်ခဲ့ကြောင်း သတင်းရရှိသည်။
