မန္တလေး၊ ပြည်ကြီးတံခွန်မြို့နယ် မှာ မနေ့ ဇွန်လ ၁၅ ရက်ညပိုင်းက ဆိုင်ကယ်စီးအမျိုးသမီး တစ်ဦး သေနတ်နဲ့ပစ်ခတ်ခံရတယ်လို့ ဒေသခံတွေဆီကသိရပါတယ်။
ညပိုင်း ၇ နာရီခန့်က ချမ်းမြသာယာရပ်ကွက် ၊ မြဝတီမင်းကြီးလမ်း ၊မန္တလေး − လားရှိုးသံလမ်းဘေးမှာ ပစ်ခတ်ခံရတာပါ။
ပစ်ခတ်ခံရသူအမျိုးသမီးဟာ အသက် ၅၀ အရွယ်ရှိပြီဖြစ်ပြီး တစ်ဦးတည်းဆိုင်ကယ်မောင်းလာချိန်မှာ အနောက်ကနေ လိုက်လာတဲ့ ဆိုင်ကယ်စီးအမျိုးသား ၃ ဦးက သေနတ်နဲ့ပစ်ခတ်တာလို့ ဒေသခံတွေက ပြောပြပါတယ်။
ပစ်ခတ်ခံရတဲ့အမျိုးသမီးဟာ ပခုံးကို ထိမှန်သွားလို့ မစိုးရိမ်ရဘူးလို့လည်းသိရပါတယ်။
ပစ်ခတ်မှုဖြစ်ပွားတဲ့နေရာဟာ လူသွားလူလာမပြတ်ပေမယ့် စစ်တပ်အာဏာသိမ်းပြီးနောက် လမ်းမီးပုံမှန်မပေးတော့လို့ လုယက်မှုမကြာခဏ ဖြစ်ပွားတဲ့နေရာလို့လည်းသိရပါတယ်။
