အာဏာသိမ်းစစ်ကောင်စီသည် ဆူးလေဘုရားလမ်းနှင့် လမ်းမသုံးခုမှ လမ်းညွှန်ဆိုင်းဘုတ်များကို အပြာရောင်မှ အစိမ်းရောင်သို့ အရောင်ပြောင်းလဲလိုက်သည်။
လမ်းညွှန်ဆိုင်းဘုတ်များကို အပြာရောင်အသုံးပြုလေ့ရှိသော်လည်း ပြည်လမ်း ၊ ကမ္ဘာအေးဘုရားလမ်း ၊ မဟာဗန္ဓုလလမ်း နှင့် ဆူးလေဘုရားလမ်းပေါ်ရှိ လမ်းညွှန်ဆိုင်းဘုတ်များကို အစိမ်းရောင်သို့ ပြောင်းလိုက်ခြင်းဖြစ်သည်။
ဗေဒင် ယတြာကို အလွန်အမင်းယုံကြည်သည့် စစ်တပ်ခေါင်းဆောင်များ၏ လုပ်ဆောင်ချက်ဖြစ်နိုင်ပြီး အကြောင်းအရာတစ်ခုခုအတွက် ယတြာချေခြင်းဖြစ်နိုင်ကြောင်း ပြည်သူများက သုံးသပ်ထားသည်။
“တိုင်းပြည်ဖွံ့ဖြိုးတိုးတက်ဖို့ မလုပ်တတ်ဘူး။ အားရင်။ယတြာပဲချေတတ်တာ။ ပြည်သူပိုင်ပစ္စည်းအလကားယူ ကိုယ်ကျိုးအတွက်အသုံးချတဲ့ ဆန်ကုန်မြေလေးတွေ “ဟု အမျိုးသားတစ်ဦးက ဆိုင်းဘုတ်အရောင်ပြောင်းသည့်အပေါ် မှတ်ချက်ပေးသည်။
လမ်းညွှန်ဆိုင်းဘုတ်များအရောင်ပြောင်းလဲခြင်းကို မေလအတွင်းက စတင်လုပ်ဆောင်ခဲ့ခြင်းဖြစ်ကြောင်းဒေသခံများက ဆိုသည်။
ထို့ပြင် ပြောင်းလဲလိုက်သည့်အရောင်သည် စစ်ကောင်စီကိုထောက်ခံသည့် ပြည်ခိုင်ဖြိုးပါတီ အရောင်ဖြစ်နေသောကြောင့် ပြည်သူများက ဝေဖန်နေခြင်းလည်း ဖြစ်သည်။
အစိမ်းရောင် လွှမ်းမိုးချင်ပါက ဆိုင်းဘုတ်များကိုပြောင်းခြင်းထက် သစ်ပင်များပိုမိုစိုက်ခြင်းက အကျိုးရှိကြောင်း ပြည်သူတစ်ဦးက ပြောသည်။
စစ်တပ်က ၎င်းတို့အာဏာသိမ်းပြီးနောက်ပိုင်းတွင် ဆိုင်းဘုတ်အချို့အား အစိမ်းရောင်ပြောင်းသည့် ဖြစ်စဉ်များရှိခဲ့သည်။
