“နွေဦးတော်လှန်ရေးနဲ့ လူထုရဲ့ သဘောထားအပေါ်မှာ အမြဲတမ်းရပ်တည်နိုင်မယ်လို့ မျှော်လင့်တယ်” – ပဒိုမန်းမန်း
နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အတွက်တော်လှန်သော မွေးနေ့ဆုမွန်လွှာကို ဧရာ၀တီပြည်နယ် ဖက်ဒရယ်ကောင်စီက ယနေ့ထုတ်ပြန်ခဲ့ရာ အာဏာရှင်စနစ်အား အမြစ်ပြတ်ချေမှုန်း အောင်ပွဲခံနိုင်ပါစေဟု ဖော်ပြထားသည်။
နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ ဇွန်လ ၁၉ရက်တွင် ကျရောက်မည့် (၇၈)နှစ်မြောက် မွေးနေ့မှသည် သက်တော်ရာကျော်ရှည်ပါစေကြောင်း ဧရာ၀တီပြည်နယ် ဖက်ဒရယ်ကောင်စီမှ ဆုမွန်ကောင်းတောင်းအပ်ပါသည်ဟု ဆုမွန်လွှာ၌ ပါရှိသည်။
ဒေါ်အောင်ဆန်းစုကြည်သည် ၁၉၉၀ ရွေးကောက်ပွဲအပြီးတွင် မတရားသဖြင့် နှစ်ရှည်နေအိမ်အကျယ်ချုပ်ချခံခဲ့ရကြောင်း ထို့အတူ ၂၀၂၀ရွေးကောက်ပွဲ အပြီးတွင်လည်း မတရားစွပ်စွဲမှုများ၊ ပုဒ်မများဖြင့် ထပ်မံ အကျဉ်းချခံရသည်ကို ယခုတိုင် ကြံ့ကြံ့ခံ ရင်ဆိုင်ပြီး ဒီမိုကရေစီ အင်အားစုများနှင့်အတူ မြန်မာနိုင်ငံ၏ အမျိုးသားတန်းတူရေးနှင့် ဒီမိုကရေစီအရေးအတွက် ကြိုးပမ်းဆောင်ရွက်နေမှုအပေါ် ဧရာ၀တီပြည်နယ်ဖက်ဒရယ်ကောင်စီမှ များစွာလေးစားဂုဏ်ယူရပါသည်ဟု မွေးနေ့ဆုမွန်လွှာ၌ဖော်ပြထားသည်။
ယခုကျရောက်မည့် (၇၈)နှစ်မြောက်တော်လှန်သော မွေးနေ့မှသည် ကိုယ်ကျန်းမာ၊ စိတ်ချမ်းသာစွာဖြင့် ပြည်သူလူထု ဦးဆောင်သော နွေဦးတော်လှန်ရေးနှင့်တူ စစ်အာဏာရှင်စနစ် အား အမြစ်ပြတ်ချေမှုန်း၍ အောင်ပွဲခံနိုင်ပါစေကြောင်း ဧရာ၀တီပြည်နယ်ဖက်ဒရယ်ကောင်စီက ထပ်လောင်းဆုမွန်ကောင်းတောင်းဖော်ပြခဲ့သည်။
ဧရာ၀တီဖက်ဒရယ်ကောင်စီကို ယခုနှစ်ဆန်းပိုင်း၌ ဖွဲ့စည်းခဲ့ပြီး အာဏာရှင်စနစ်အားလုံးဖျက်သိမ်းရေး၊ ၂၀၀၈ဖွဲ့စည်းပုံဖျက်သိမ်းရေး နှင့် ဖက်ဒရယ်ဒီမိုကရေစီ ပြည်ထောင်စုစနစ်တည်ဆောက်ရေး ရည်ရွယ်ထားကြောင်း အသိပေးထားသည်။
ကရင်တိုင်းရင်းသားခေါင်းဆောင်တစ်ဦးဖြစ်သူ ပဒိုမန်းမန်းအား ဒေါ်အောင်ဆန်းစုကြည်မွေးနေ့ အမှတ်တရစကား ပြောကြားပေးရန်မေးမြန်းရာလူထုနှင့်အတူ အမြဲရပ်တည်နိုင်မည်ဟု မျှော်လင့်ကြောင်း ပြောကြားသည်။
“နွေဦးတော်လှန်ရေးနဲ့ လူထုရဲ့သဘောထားအပေါ်မှာ အမြဲတမ်းရပ်တည်နိုင်မယ်လို့ မျှော်လင့်တယ်”ဟု ပဒိုမန်းမန်းက ပြောကြားခဲ့သည်။
