စစ်ကိုင်းတိုင်း၊ စစ်ကိုင်းမြို့နယ်တွင် စစ်ကောင်စီတပ်က ဇွန်လဝက်အတွင်း ကျေးရွာ၁၁ရွာမှ နေအိမ် ၁,၅၀၀ ကျော်ကို မီးရှို့ဖျက်ဆီးခဲ့ကြောင်း ဒေသတွင်းသတင်းရင်းမြစ်များက ပြောသည်။
ဇွန်လဆန်းမှ ၁၇ ရက်အထိ လဝက်အတွင်း စစ်ကိုင်းမြို့နယ်ရှိ ကျေးရွာပေါင်း ၁၁ ရွာမှ နေအိမ်ပေါင်း ၁,၅၀၀ ကျော် မီးရှို့ဖျက်ဆီးခံခဲ့ရကာ သာဇင်ရွာမှာ အများဆုံးဖြစ်ပြီး အိမ်ခြေ ၆၀၀ ကျော် ပြာကျခဲ့ကြောင်း ဒေသခံများက ပြောသည်။
အိမ်ခြေ ၁,၅၀၀ကျော်ရှိသည့် ပဒူကျေးရွာကိုလည်း စစ်ကောင်စီတပ်က တပ်စွဲထားပြီး ရက်ခြား မီးရှို့ဖျက်ဆီးနေသည်မှာ ဆယ်ကြိမ်ထက်မနည်းရှိနေကြောင်း ဒေသတွင်း စစ်ရှောင်ကူညီနေသူတစ်ဦးက ပြောသည်။
“မီးဘေးသင့်စစ်ဘေးရှောင်လူထု များစွာသောအခက်အခဲများကြုံတွေ့နေရပါတယ်။ ဝိုင်း၀န်းကူညီပေးကြပါလို့ အနူးညွှတ်တောင်းဆိုပါတယ်။”ဟု Sagaing District Medical Team အဖွဲ့ တာဝန်ရှိသူက ပြောသည်။
စစ်ကိုင်းမြို့နယ်တွင် ၂၀၂၂ ဧပြီမှ ယနေ့အထိ ကျေးရွာပေါင်း ၄၈ရွာမှ နေအိမ် ၄,၀၀၀ နီးပါး မီးရှို့ဖျက်ဆီးခံခဲ့ရကြောင်း ဒေသတွင်း စစ်ဘေးရှောင်ကူညီနေသူများက ပြောသည်။
စစ်ကိုင်းတိုင်းတွင် အာဏာသိမ်းစစ်ကောင်စီတပ်နှင့် ၎င်း၏ အပေါင်းအပါများ မီးရှို့ဖျက်ဆီးမှုကြောင့် ၂၀၂၁ မေလ ၁ ရက်မှ ၂၀၂၃ မေ ၃၁ ရက်အထိ နေအိမ်ပေါင်း၅၃,၈၁၆ လုံး ပျက်စီးဆုံးရှုံးခဲ့ကြောင်း Data For Myanmar က ထုတ်ပြန်ထားသည်။
