“သံတမန်အဖြစ်လာခဲ့တယ်ဆိုတော့ ဂိတ်မှာမရပ်ဘူးလေ။မရပ်တော့ ခြောက်လှန့်လိုက်တဲ့သဘော ပစ်လိုက်တာ”
တရုတ်ကိုယ်စားလှယ်အဖွဲ့တစ်ခု မြစ်ကြီးနားသို့ လာရောက်စဉ် ပစ်ခတ်ခဲ့သည့်အဖွဲ့မှာ စစ်ကောင်စီ လက်အောက်ခံ ရွှေမင်းပြည်သူ့စစ်အဖွဲ့မှ ဖြစ်သည်ဟု ကချင်သတင်းရင်းမြစ်တစ်ဦးက ပြောသည်။
နယ်ခြားဒေသ ပုံမှန်ဆွေးနွေးပွဲတစ်ခုအတွက် မြစ်ကြီးနားမြို့သို့ လာရောက်သည့် တရုတ်တပ်မတော်ဆိုင်ရာ ကိုယ်စားလှယ်အဖွဲ့ကို ဇွန်လ ၂၇ရက်တွင် ကချင်လွတ်လပ်ရေးတပ်မတော် (KIA) က ပစ်ခတ်ခြင်းဖြစ်ကြောင်း စစ်ကောင်စီဘက်က စွပ်စွဲမှု အပေါ် ကချင်သတင်းရင်းမြစ်က ရှင်းပြခြင်းဖြစ်သည်။
“တရုတ်ယာဉ်တန်းလာခဲ့တာ။အဲ့မှာ ရွှေမင်းလီဆူပြည်သူ့စစ်တွေနဲ့ စကစတွေ တပ်ဖြန့်ပြီးနေကြတယ်။ KIA အဲနား လာကပ်လို့မရအောင် သူတို့ လုံခြုံရေးယူထားတဲ့ နေရာ။ အရက်မူးပြီး ရမ်းပစ်လိုက်တာ။ သံတမန်အဖြစ်လာခဲ့တယ်ဆိုတော့ ဂိတ် မှာ မရပ်ဘူးလေ။မရပ်တော့ ခြောက်လှန့်လိုက်တဲ့သဘောပစ်လိုက်တာ”ဟု ကချင်ဒေသခံက ပြောသည်။
ပစ်ခတ်ခံရသည့်နေရာ၌ ရွာမရှိဘဲစစ်ကောင်စီနှင့် ရွှေမင်းပြည်သူ့စစ်တပ်၏ ဂိတ်သာရှိသည်ဟု ဆိုသည်။
“အဲဒီဖက် သတင်းသမားတွေ လာလို့မရဘူး။ ဖုန်း ကအစ အစစ်ဆေးကြမ်းတာ။သတင်းဖုံးချင်လို့” ဟု ကချင်ဒေသခံက ပြောသည်။
ရွှေေမင်းလီဆူ ပြည်သူ့စစ်များသည် အဆိုပါ ဂိတ်မှနေ၍ ခရီးသည်များကို ငွေကြေးတောင်းခံမှုများ ပြုလုပ်နေကြောင်း၊အဆိုပါ ပြည်သူ့စစ်တပ်ဖွဲ့ဝင်များ မူးယစ်စားသောက် ပြီး သတိလက်လွတ်သေနတ်ရမ်းကားပစ်ခတ်မှုများရှိသည်ကိုဒေသခံပြည်သူများ အသိပင်ဖြစ်ကြောင်း ၎င်းကဆိုသည်။
အဆိုပါ ဆဒုံး- ကန်ပိုက်တီလမ်းတွင် KIAနှင့် စစ်ကောင်စီတပ်တို့ ဇွန်လ ၂၆ရက်မှစ၍ တိုက်ပွဲများ ဆက်တိုက်ဖြစ်ပွားခဲ့ပြီးပြီးခဲ့သည့် ရက်ပိုင်းကKIA တပ်စခန်းငယ်တစ်ခုလက်လွှတ်ဆုံးရှုံးခဲ့ရသည်ဟု ကချင်သတင်းရင်းမြစ်တစ်ဦးက ပြောသည်။
