ဒရုန်းတပ်ဆင်မောင်နှင်ခြင်း၊ ကင်းထောက်ခြင်းနှင့် မြေပြင်၊ ဝေဟင်ပူးတွဲ ချေမှုန်းရေးအတွက် တပ်ခွဲ (၈)ခုကို သင်တန်းပို့ချခဲ့ကြောင်း ရှမ်းပြည် (တောင်ပိုင်း) ဒေသခံတော်လှန်ရေးတပ်ပေါင်းစု – S.S.L.R.U က ယနေ့ အသိပေးထုတ်ပြန်သည်။
S.S.L.R.U နှင့် ရိုးမမာန်စွယ် ပြောက်ကျားတပ်ဖွဲ့တို့မှ ပူးတွဲပို့ချခဲ့သော သင်တန်းဆင်းပွဲကိုမူ ယမန်နေ့က အောင်မြင်စွာပြုလုပ်နိုင်ခဲ့သည်ဟု ဆိုသည်။
“ဒီတော်လှန်ရေးမှာ နည်းပညာအကူအညီဟာ မြေပြင်စစ်ဆင်ရေးတွေကို အထောက်အပံ့ပေးနိုင်ဖို့ရယ်နဲ့ မဟာမိတ်အဖွဲ့အစည်းတွေကို ဒရုန်းနည်းပညာတွေကို ဝေမျှပေးနိုင်ဖို့အတွက် ဒီသင်တန်းကို ပို့ချမျှဝေပေးရခြင်းဖြစ်ပါတယ်”ဟု S.S.L.R.U တာဝန်ရှိသူက လူထုနွေဦးသို့ ပြောသည်။
သင်တန်းကာလတွင် ဒရုန်းတပ်ဆင်ခြင်းနှင့် မောင်းနှင်ခြင်းသင်ခန်းစာများကို စာတွေ့လက်တွေ့ သင်ကြားမျှဝေပေးခြင်း၊ ဒရုန်းကင်းထောက်ခြင်း နည်းနာများ၊ မြေပြင်နှင့် ဝေဟင်ပူးတွဲ ချေမှုန်းရေးနည်းနာများကို မျှဝေပို့ချခဲ့ကြောင်း အသိပေးသည်။
အဆိုပါသင်တန်းကို ရှမ်းပြည်(တောင်ပိုင်း) ဒေသခံတော်လှန်ရေးတပ်ပေါင်းစု – S.S.L.R.Uမှ တပ်ခွဲများဖြစ်သည့်ချိူးဖြူတော်လှန်ရေးတပ်ဖွဲ့ – J.P.R.F ၊အောင်ပန်းမြို့ပြပျောက်ကြားတပ်စု – UTF ABN၊ရှမ်းရိုးမမြေအောက်ပြည်သူ့ကာကွယ်ရေးတပ်ဖွဲ့ – SYM UGPDF၊ Red Ants Guerilla Force တို့ပါဝင်သည်။
ထို့အတူ ညီနောင်မဟာမိတ်အဖွဲ့အစည်းများဖြစ်ကြသည့်ရိုးမမာန်စွယ် ပြောက်ကျားတပ်ဖွဲ့ နှင့် တောင်တွင်းကြီးပြည်သူ့ကာကွယ်ရေးအဖွဲ့ (တောင်တွင်းကြီး ပ.က.ဖ)၊ နေပြည်တော်ပြည်သူ့ကာကွယ်ရေးအဖွဲ့ (နေပြည်တော် ပ.က.ဖ)၊ ဗိဿနိုး ပြည်သူ့ကာ ကွယ်ရေးတပ်ဖွဲ့ တို့မှသင်တန်းသားစစ်သည်များလည်း တက်ရောက်ခဲ့ကြောင်း ထုတ်ပြန်ချက်၌ ဖော်ပြသည်။
