လိုင်ဇာဌာနချုပ်အနီး တပ်ရင်း ၈ရင်းဖြင့် စစ်ကြောင်းထိုးထားသည့် စစ်ကောင်စီတပ် တိုက်ပွဲများအတွင်း အထိနာဟု ကချင်စစ်ရေးသတင်းရင်းမြစ်ပြော

▪︎စစ်ကောင်စီတပ်ရင်းအချို့ပိတ်မိနေ၊ လေကြောင်းမှ ကျည်၊ရိက္ခာများဖြည့်တင်းဟုဆို

ကချင်လွတ်လပ်ရေးအဖွဲ့/ကချင်လွတ်လပ်ရေးတပ်မတော်(KIO/KIA) ဌာနချုပ် လိုင်ဇာမြို့အနီး နန်ဆန်ယာန်ဒေသသို့စစ်ကောင်စီတပ်က စစ်အင်အားအများအပြားဖြင့် စစ်ကြောင်းထိုး လှုပ်ရှားလာ၍ တိုက်ပွဲများနေ့စဉ်ဖြစ်ပွားလျက်ရှိကြောင်း ကချင်ဒေသစစ်ရေးသတင်းရင်းမြစ်က ပြောသည်။

ဇွန်လ ၁၆ရက်တွင်နန်ဆန်ယာန်ရွာအနီးတိုက်ပွဲဖြစ်ပွားပြီးနောက်ဇူလိုင် ၃ရက်မှစ၍ ယင်းဒေသ၌ပင် စစ်အင်အားများဖြည့်တင်းထိုးစစ်ဆင်လာ၍ ယနေ့အထိ တိုက်ပွဲများဖြစ်ပွားခြင်း၊ လက်နက်ကြီးများ ပစ်ခတ်ခြင်း နေ့စဉ်လိုလို ပြုလုပ်လျက်ရှိသည်ဟုဆိုသည်။

“လိုင်ဇာနားရှိနမ့်ဆန်ယာန်ဘက် စကစ ဘက်က တပ်ရင်း ၈ရင်းထိုးထားတယ်။ နေ့တိုင်းတိုက်ပွဲပြင်းထန်နေတယ်။”ဟု ကချင်စစ်ရေးသတင်းရင်းမြစ်က ပြောသည်။

အဆိုပါဒေသသို့ စစ်ကြောင်းထိုးထားသည့် စစ်ကောင်စီတပ်များမှာ ​ခြေလျင်တပ်ရင်း-ခလရ(၁၃)၊ (၁၇)၊ (၁၀၃)၊ (၂၃၆)၊ (၈၃) (၇၇) တပ်များနှင့်ခြေမြန်တပ်ရင်း-ခမရ(၃၁၈)၊ (၃၈၅) တပ်များဖြစ်သည်ဟု သိရသည်။

“ လ -၁၃/၂၃၆/၁၀၃ ထိခိုက်ကျဆုံးများနေတယ်။ ကြားမှာပိတ်မိနေတယ်။ လေယာဉ်ဗုံးကြဲတာ မရှိသေး။” ဟု ကချင်စစ်ရေးသတင်းရင်းမြစ်က ပြောသည်။

ဇူလိုင် ၈ရက် ညပိုင်းတွင် လေကြောင်းမှ ရိက္ခာနှင့် ကျည်များ လာရောက်ချပေးသွားကြောင်း ၎င်းက ဆက်​ပြောသည်။

နန်ဆန်ယာန်ဒေသတိုက်ပွဲများ ဖြစ်ပွားနေပြီး စစ်ကောင်စီက စစ်အင်အားများဖြည့်တင်းနေမှုကို KIA သတင်းနှင့် ပြန်ကြားရေးဌာန တာဝန်ခံ ဗိုလ်မှူးကြီးနော်ဘူက အတည်ပြုပြောကြားထားပြီး အသေးစိတ် အခြေအနေများကို ဆက်လက်မေးမြန်းထားဆဲဖြစ်သည်။

စစ်​ကောင်စီတပ် စစ်​ကြောင်းများထိုးလာသဖြင့်​ဒေသခံများမှာ လိုင်ဇာနှင့် ဝိုင်း​မော်ဘက်သို့ထွက်​ပြေးတိမ်း​ရှောင်​နေကြရ​ကြောင်း​ဒေသခံများက​ပြောသည်။ ကချင်ပြည်နယ်တွင် ၂၀၁၁ ခုနှစ်၌ တစ်​ကျော့ပြန်စစ်ပွဲများဖြစ်ပွားခဲ့ရာတန်ဆန်ယာန်ရွာ ​ဒေသခံပြည်သူများအားလုံးစစ်​ဘေး​ရှောင်ခဲ့ရသည်။ မိုင်းနှင့်နယ်​မြေရှင်းလင်းပြီး​နောက် ၂၀၁၈ တွင် စ၍မိသားစုအချို့ပြန်လည်​နေထိုင်ကြပြီး ယခု​နောက်ပိုင်းတွင်မိသားစုအများစုပြတ်လည်​နေထိုင်ကြရာမှ ယခုထပ်ဖြစ်၍ ထပ်မံထွက်​ပြေးတိမ်း​ရှောင်ကြရခြင်းဖြစ်သည်။

ကချင်ပြည်နယ် ဆဒုံး-ကန်ပိုက်တီးဒေသ၊ တနိုင်းလီဒိုလမ်း ဝါဒရာဇွပ်ဒေသ၊ မြစ်ကြီးနား – ဗန်းမော်လမ်း ဒေါ့ဖုန်းယာန်ဒေသ တို့တွင် KIAနှင့် စစ်ကောင်စီတပ်တို့ တိုက်ပွဲဖြစ်ပွားခဲ့သည်။ စစ်ကောင်စီတပ်က တိုက်ပွဲမဖြစ်သည့် လိုင်ဇာဌာနချုပ်နှင့် နီးသော မိုင်ဆက်ပါဒေသသို့ လက်နက်ကြီးများ ဖြင့်ပစ်ခတ်ခဲ့သည်ဟုဆိုသည်။

ထိုအပြင်ရှမ်းပြည်နယ် ကွတ်ခိုင်မြို့နယ်တွင်လည်း KIAနှင့် စစ်ကောင်စီတပ်တို့အကြား တိုက်ပွဲများ ဖြစ်ပွားလျက်ရှိပြီး အသေးစိတ် အခြေအနေကို စုံစမ်းဆဲဖြစ်သည်။