တနင်္သာရီတိုင်း သရက်ချောင်းမြို့နယ် ရငဲကျေးရွာသို့ရောက်ရှိလာသည့် စစ်ကောင်စီတပ်များက ဒေသခံများအား မောင်းထုတ်ကာ ရွာထဲတပ်စွဲထားသောကြောင့် ပြည်သူများထွက်ပြေးတိမ်းရှောင်နေကြရကြောင်း ဒေသခံများက People’s Spring သို့ ပြောသည်။
လွန်ခဲ့သောတစ်ပတ်ခန့်က အင်အား ၃၀ကျော်ဖြင့် ရောက်ရှိလာသော စစ်ကောင်စီတပ်သည် ရငဲရွာမှ ဒေသခံပြည်သူများအား ၎င်းတို့၏နေအိမ်များတွင် နေထိုင်ခွင့်မပြုဘဲ ကျေးရွာမှထွက်ခွာကြရန် ဖိအားပေးခြိမ်းခြောက်ခဲ့သည်ဟု ဒေသခံများက ဆိုသည်။
“စစ်သားတွေက ရွာထိပ်ဘုန်းကြီးကျောင်းမှာနေနေကြပါတယ်။ ရွာထဲမှာ ဘယ်သူမှနေခွင့်မရကြပါဘူး။ ရွာလမ်းတွေကို သက်ပင်တွေလှဲပြီး ပိတ်ထားပါတယ်”ဟု ရငဲရွာမှ ဒေသခံပြည်သူတစ်ဦးက People’s Spring သို့ ပြောသည်။
စစ်ကောင်စီတပ်က ရငဲရွာခံများအား ကျေးရွာတွင်မနေကြဖို့ ဖိအားပေးခြိမ်းခြောက်စဥ် ရွာသားငါးဦးက ရွာပြင်မထွက်ဘဲ ပုန်းခိုနေသည်ကို စစ်တပ်က တစ်အိမ်တက်ဆင်းရှာဖွေဖမ်းဆီးပြီး ရွာမှထွက်မသွားပါက ပစ်သတ်မည်ဟု ခြိမ်းခြောက်ကာ ဖမ်းဆီးချုပ်နှောင်၍ တစ်ညအကြာတွင်မှ ပြန်လွှတ်ပေးခဲ့ကြောင်း အထက်ပါဒေသခံက ဆက်ပြောသည်။
သရက်ချောင်းမြို့နယ်ရှိ ရငဲရွာသည် အိမ်ခြေ (၁,၀၀၀)ခန့်ရှိပြီး လူဦးရေ(၅,၀၀၀)ဝန်းကျင်ရှိသည့် ကျေးရွာကြီးတစ်ရွာဖြစ်ကာ လက်ရှိတွင် ရွာ၌ စစ်ကောင်စီတပ်များ ဝင်ရောက်တပ်စွဲထားသောကြောင့် ဒေသခံပြည်သူများ ဘေးလွတ်ရာထွက်ပြေးနေကြရပြီး စားဝတ်နေရေး အခက်အခဲများရှိနေသည်ဟု ယင်းဒေသခံများက ပြောသည်။
“အလှူရှင်တွေက တတ်နိုင်သလောက်တော့ လှူပေးကြပါတယ်။ ဒါပေမဲ့ အဓိကလိုအပ်ချက်က စားဝတ်နေရေးပါပဲ”ဟု ရငဲဒေသခံတစ်ဦးက ရှင်းပြ သည်။
သရက်ချောင်းမြို့နယ်တွင် ထိတွေ့တိုက်ပွဲအပါအဝင် ယခုရက်ပိုင်းအတွင်း စစ်ရေးလှုပ်ရှားမှုများမရှိသော်လည်း စစ်ကောင်စီတပ်က ကျေးရွာများသို့ ဝင်ရောက်ကာ ဒေသခံများအားရွာမှ မောင်းထုတ်ခြင်း၊ နေအိမ်များအား ဖောက်ထွင်းခိုးယူခြင်းများ ကျူးလွန်လျှက်ရှိကြောင်း ဒေသခံများထံမှ စုံစမ်းသိရသည်။
