ချင်းပြည်နယ် ကန်ပက်လက်မြို့နယ် ကျင်ဒွေးမြို့သို့သွားသည့် စစ်ကောင်စီတပ်စစ်ကြောင်းကို ကန်ပက်လက် ချင်းကာကွယ်ရေးတပ်(CDF)နှင့် ပူးပေါင်းတပ်က တိုက်ခိုက်ခဲ့ရာ စစ်ကောင်စီတပ်က ထိခိုက်မှုရှိခဲ့ပြီး တိုက်ပွဲဖြစ်ပွားရာနေရာရှိ မှတ်တမ်းဓာတ်ပုံများကို ယနေ့ထုတ်ပြန်သည်။
ကျင်ဒွေးမြို့ စစ်ကောင်စီတပ်စခန်းသို့ ဦးတည်သည့် စစ်ကြောင်းနှင့် တိုက်ပွဲများ ပြင်းထန်စွာ ဖြစ်ခဲ့ရာ ကားမိုင်းနှင့် နင်းမိုင်းများစွာ ပေါက်ကွဲခဲ့သည်ဟု ကန်ပက်လက် CDFက ဖော်ပြသည်။
တိုက်ပွဲဖြစ်ပွားသည့်နေရာများသို့ နယ်မြေရှင်းလင်းရေး လုပ်ဆောင်ခဲ့စဉ် တွေ့ရသော မှတ်တမ်းဓာတ်ပုံများကိုဖော်ပြရာ မိုင်းခွဲတိုက်ခိုက်ခဲ့သည့် နေရာများ၊ စစ်ကောင်စီတပ်ယာဉ်တန်းမှ ကားဘီးထိခိုက်ပျက်စီးမှု အချို့နှင့် ကျည်ခွံများ၊ ပတ်တီးစနှင့် အဝတ်အထည် အပျက်အစီးအချို့ကို ဖော်ပြခဲ့သည်။ ယင်းမှတ်တမ်းဓာတ်ပုံတွင် အရံမီးသတ်တပ်ဖွဲ့၏ ယူနီဖောင်း ပျက်စီးမှုကိုလည်း တွေ့ရသည်။
စစ်ကောင်စီတပ်မှ အင်အား ၃၀၀ခန့်ရှိသည့် စစ်ကြောင်းသည်ဆောမြို့နယ်မှ ကျင်ဒွေးသို့ ဇူလိုင်လလယ်ကတည်းက ထွက်ခွာလာခြင်းဖြစ်ပြီး ဆောနယ်နှင့်ကန်ပက်လက်နယ်အတွင်း၌ ဒေသခံ ကာကွယ်ရေး ပူးပေါင်းအဖွဲ့က တိုက်ခိုက်မှုများ လုပ်ဆောင်ခဲ့သည်။
ထို့ပြင် ကန်ပက်လက်မြို့မှ တပ်ချိန်းပြီး ဆောမြို့နယ် ကျောက်ထုသို့ ပြန်လာသည့် စစ်ကောင်စီတပ်ကိုလည်း ကာကွယ်ရေးပူးပေါင်းတပ်က တိုက်ခိုက်ခဲ့ရာ တိုက်ပွဲများဖြစ်ခဲ့သည်။
ဆောနယ်မှ ထွက်လာသည့် စစ်ကြောင်းသည် ကျောက်ထုအမြောက်တပ်သို့ ရောက်ရှိပြီဖြစ်ကြောင်း ဆောနယ်ဒေသခံက ပြောသည်။ ကျင်ဒွေးကိုသွားသည့်တပ်သည် ကျင်ဒွေးမြို့သို့ မရောက်သေးဟု သိရကြောင်း ၎င်းက ဆိုသည်။
