ကရင်ပြည်နယ်၊ ဘုရားသုံးဆူမြို့အခြေစိုက် စစ်ကောင်စီ၏ မူဂျာထိပ်စခန်းကို PDF ပူးပေါင်းစစ်ကြောင်းက SF-Z မောင်းသူမဲ့ယာဥ်ငယ်ဖြင့် ဗုံးသီးခြောက်လုံးကြဲချတိုက်ခိုက်ခဲ့ကြောင်း မွန်ပြည်တော်လှန်ရေးတပ်(MSRF)မှ တာဝန်ရှိသူတစ်ဦးက ပြောသည်။
ယမန်နေ့(ဇူလိုင် ၂၈)နံနက် ၈နာရီခွဲခန့်က ထိုင်း – မြန်မာနယ်စပ်မျဉ်းပေါ်ရှိ စစ်ကောင်စီတပ်၏ မူဂျာထိပ်စခန်းကို MSRF၊ YAF၊ ထားဝယ်ခရိုင်အမှတ်(၂) တပ်ရင်း (T-5)၊ KB PDF၊ TPLF၊ ဒေါနစစ်ကြောင်းနှင့် ABSDF(တပ်ရင်း -၁)တို့ ပူးပေါင်းပြီး SF-Z လေယာဉ်ဖြင့် ဗုံးကြဲတိုက်ခိုက်ခဲ့ခြင်း ဖြစ်သည်။
![စစ်ကောင်စီ၏ မူဂျာထိပ်စခန်းတည်နေရာမြေပုံ](https://i0.wp.com/www.ludunwayoo.com/wp-content/uploads/2023/07/363778960_622801413251988_5000159446278583540_n.jpg?resize=499%2C1080&ssl=1)
“လက်နက်ကြီးကုန်းလို့ ယူဆရတဲ့နေရာကို စစ်ရေးပစ်မှတ်အဖြစ်ရွေးချယ် တိုက်ခိုက်ခဲ့တာပါ။ ဒီကောင်တွေဘက်က(စခန်းမှာ)တပ်ခွဲတစ်ခွဲစာ အင်အားရှိနေပါတယ်။ သေချာကင်မရာနဲ့ကြည့်ပြီး ချတာဆိုတော့ ထိခိုက်မှုရှိမှာပါ”ဟု မူဂျာထိပ်စခန်းတိုက်ခိုက်မှုအခြေအနေအား MSRF မှ တာဝန်ရှိသူတစ်ဦးက People’s Spring သို့ ပြောသည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
ယခုစစ်ဆင်ရေးကို “မိုးကြိုးစစ်ဆင်ရေး”အဖြစ် အမည်ပေးထားပြီး မွန်ပြည်နယ်နှင့် တနင်္သာရီတိုင်း အခြေစိုက် တော်လှန်ရေးမဟာမိတ်အင်အားစုများ ပူးပေါင်းဆောင်ရွက်ခြင်းဖြစ်ကာ တောင်ပိုင်းစစ်ဒေသခွဲ-၃ ၏ မဟာဗျူဟာလုပ်ငန်းစဉ်မှ စစ်ရေးရည်မှန်းချက်တစ်ခုအား ဖော်ဆောင်ခြင်းလည်းဖြစ်ကြောင်း MSRFက အသိပေးသည်။
တောင်ပိုင်းစစ်ဒေသခွဲ-၃ ၏ မဟာဗျူဟာလုပ်ငန်းစဉ်မှ SF-Z မောင်းသူမဲ့ယာဥ်ငယ်အသုံးသည့် ပထမဆုံးစစ်ဆင်ရေးအဖြစ် ဇူလိုင် ၁၄ရက်တွင် မွန်ပြည်နယ်၊ ရေးမြို့အခြေစိုက် စစ်ကောင်စီလက်အောက်ခံအမှတ်(၁၉) စစ်ဆင်ရေးကွပ်ကဲမှုဌာနချုပ် (စကခ – ၁၉) ၊ ခလရ – ၆၁ နှင့် အမြှောက်တပ်(အမတ – ၃၁၆)တို့ကို PDF ပူးပေါင်းစစ်ကြောင်းမှ ဗုံးသီးလေးလုံးကြဲချတိုက်ခိုက်ခဲ့သည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)