တမူးမြို့နယ်၊ ခမ်းပါတ်မြို့အနီး ဇူလိုင်လကုန်ပိုင်းတွင် တိုက်ပွဲများခေတ္တရပ်နားပြီး စစ်ရေးတင်းနေရာမှ နှစ်ရက်ဆက်တိုက်ပွဲပြန်ဖြစ်ကြောင်းဒေသခံအချို့က ပြောသည်။
ယမန်နေ့ (သြဂုတ် ၂ )ရက်တွင် ခမ်းပါတ်မြို့နယ် ၊ကံမကြီးရွာတွင် တိုက်ပွဲဖြစ်ပွားပြီး ယနေ့ (သြဂုတ် ၃) နံနက်တွင် ထင်းဇင်ရွာတွင်တိုက်ပွဲဖြစ်ပွားခဲ့ကြောင်းသိရသည်။
“ထင်းဇင်ရွာသစ်မှာ စစ်ကောင်စီနဲ့ တော်လှန်ရေတပ်သားတွေတိုက်နေပါတယ်။စစ်ကောင်စီကလယ်ပြင်လမ်းကနေတက်လာတာပါ”ဟုဒေသခံတစ်ဦးကပြောသည်။
အင်အား( ၈၀ ) ဝန်းကျင်ပါသော စစ်ကောင်စီတပ်သည် ကံမကြီးရွာမှ ပြည်သူ သုံးဦးကို ပေါ်တာဆွဲလာပြီး ထင်းဇင်ရွာသို့လာ၍ ဘုန်းကြီးကျောင်း၌ တပ်စွဲထားစဥ် ဒေသတွင် တော်လှန်ရေးအင်အားစုများက ယနေ့ နံနက် ၈ နာရီခွဲခန့်တွင်စတင် တိုက်ခိုက်ခဲ့ခြင်းဖြစ်ကြောင်းဒေသခံ အချို့ကပြောသည်။
“ဒီနေ့ကရွာထဲမှာကိုဖြစ်နေတာပါ။ခုတော့ဘယ်ဘက်ကထုတာလည်းမမြင်ရပေမယ့်လက်နက်ကြီးထုသံတွေပါကြားရတယ်”ဟု ဒေသခံတစ်ဦးက People’s Spring သို့ပြောသည်။
၂ ရက်ဆက်တိုက်ပွဲတွင် ထိခိုက်ကျဆုံးမှု အခြေအနေများကိုမူ မသိရသေးပေ။ စစ်ကောင်စီက တမူးမြို့နယ် ၊ခမ်းပါတ်မြို့အနီးဝန်းကျင်များကို ဖုန်းနှင့် အင်တာနက်လိုင်းများဖြတ်တောက်ထား၍ဆက်သွယ်ရေးခက်ခဲနေကြောင်းလည်းသိရသည်။
ယမန်နေ့က တိုက်ပွဲဖြစ်ပွားခဲ့သော ကံမကြီးရွာနှင့် ယနေ့တိုက်ပွဲဖြစ်သော ထင်းဇင်ရွာ သည် ရွာနီးခြင်းဖြစ်ပြီး သစ်တော်တစ်ခုသာခြားကာ တိုက်ပွဲများမှာ ခမ်းပါတ်မြို့မှ မြောက်ဘက်သို့ရွေ့လာကြောင်းဒေသခံအချို့ကပြောသည်။
“ခမ်းပါတ်ပီ ၊ကနန် ၊ကံမကြီး ၊ထင်းဇင် ၊ ဘုတ်ကန်တစ်ဆက်တည်းရွာတွေပါ။တိုက်ပွဲကမြောက်ပိုင်းကိုတဖြေးဖြေးနဲ့တိုးသွားတယ်။ထင်းဇင်ပီးရင်တော့ဘုတ်ကန်ဖြစ်မယ်လို့ထင်တာပဲ”ဟုဒေသခံတစ်ဦးကပြောသည်။
တိုက်ပွဲဖြစ်၍ အိန္ဒိယနယ်စပ်သို့ထွက်ပြေးသောစစ်ဘေးရှောင်များကို အိန္ဒိယနယ်စပ်မှ လက်နက်ကိုင်တပ်ဖွဲ့ဝင်များက ဆိုင်ကယ်နှင့် ကားများကို အဝင်မခံဘဲ လူကိုသာပေးဝင်ကြောင်းလည်းဒေသခံအချို့က ပြောသည်။ ဇူလိုင် ၂၇ ရက်နောက်ပိုင်းတွင် အိန္ဒိယက နယ်စပ်သို့ထွက်ပြေးတိမ်းရှောင်လာသော စစ်ဘေးရှောင်ပြည်သူများကို နေရပ်ပြန်ခိုင်းခဲ့သေးသည်။ထိုနောက် ယနေ့တွင်မူ လူချည်းသက်သက် ပြန်လည်ဝင်ရောက်ခွင့်ပြုခြင်းဖြစ်သည်။
ခမ်းပက်မြို့ရှိ ရဲစခန်းနှင့် စစ်ကောင်စီတပ်ကို တော်လှန်ရေးအင်အားစုများက ဇူလိုင် ၂၂ ရက်ညတွင်စတင်တိုက်ခိုက်ပြီး စစ်တပ်က ကလေးမြို့မှ စစ်သားများကို ဇူလိုင် ၂၃ ရက်တွင်လေကြောင်းမှ ခမ်းပက်မြို့ နှင့်အနည်းငယ်သာဝေးသောနေရာသို့ချ၍ ပို့ပေးခဲ့သည်။ ထိုစစ်ကူများကိုပါတော်လှန်ရေးအဖွဲ့များက ဇူလိုင် ၂၃ ရက်တွင် ကြားဖြတ်တိုက်၍ စစ်ကောင်စီတပ်အထိနာခဲ့သည်။ထိုနောက် တိုက်ပွဲ များပိုမိုပြင်းထန်လာပြီး ဇူလိုင် ၂၅ ရက်မှစ၍ လေကြောင်းမှ ဗုံးကျဲတိုက်ခိုက်ခဲ့သည်။ထိုအပြင် ခမ်းပါတ်မြို့ပေါ်ရှိနေအိမ်များကိုပါ မီးရှို့ ခဲ့သည်။
တိုက်ပွဲများကြောင့်ဒေသခံပြည်သူ ထောင်နှင့်ချီ၍ ဘေးလွတ်ရာထွက်ပြေးတိမ်းရှောင်နေကြရသည်။ စစ်ဘေးရှောင်ကလေးငယ်တစ်ဦးမှာထွက်ပြေးတိမ်းရှောင်စဥ် နေထိုင်မကောင်းဖြစ်ပြီးအချိန်မိဆေးကုသမှု မခံရ၍ကွယ်လွန်ခဲ့သည်။ထို့အပြင် စစ်ဘေးရှောင်ပြည်သူတစ်ဦးမှာ စစ်ဘေးရှောင်နေရာမှ ရွာပြန်စဥ် စစ်တပ်ကဖမ်းဆီးသတ်ဖြတ်ခဲ့ကြောင်းဒေသခံအချို့ကပြောသည်။
ထိုနောက် ဇူလိုင် လကုန်ပိုင်းတွင်နှစ်ဖက် ကြားတပ်ဆိုင်ထားပြီး တိုက်ပွဲခေတ္တရပ်နားခဲ့ရာမှ သြဂုတ် ၂ ရက်တွင်တိုက်ပွဲများပြန်ဖြစ်ခဲ့သည်။ထိုကြောင့် ထွက်ပြေးနေသောစစ်ဘေးရှောင်များနေရပ်မပြန်နိုင်ကြသေးပေ။
