တနင်္သာရီတိုင်း၊ လောင်းလုံးမြို့နယ်၊ နခံတောကျေးရွာအနီးတွင် စစ်ကောင်စီတပ်နှင့် တော်လှန်ရေးပူးပေါင်းတပ်များကြား ထိတွေ့တိုက်ပွဲဖြစ်ပွားကာ စစ်ကောင် စီတပ်မှ ၁၀ဦးခန့်သေဆုံး၍ ဗိုလ်ကြီးတစ်ဦးအပါအဝင် ၂၆ဦးခန့် ထိခိုက်ဒဏ်ရာရသွားကြောင်း ဗထူးစစ်ကြောင်းက ယနေ့(သြဂုတ် ၃) ထုတ်ပြန်သည်။
နခံတောရွာရှိ ရပ်ခံတောင်ပေါ်ဘုရားကုန်းသို့ စစ်ကောင်စီတပ်မှ အင်အား ၁၅၀ခန့်ဖြင့် မြေသယ်ယာဥ်များနှင့် ဇူလိုင် ၂၂ ရက်တွင် ရောက်ရှိလာရာ ယင်းနေ့နံနက် ၆ နာရီခွဲခန့်တွင် ဗထူးစစ်ကြောင်းမှရဲဘော်များနှင့် ထိပ်တိုက်တွေ့ကာ မိနစ် ၂၀ ခန့်တိုက်ပွဲဖြစ်ပွားခဲ့ကြောင်း ဖော်ပြသည်။
အဆိုပါတိုက်ပွဲတွင် ဗထူးစစ်ကြောင်းမှ ရဲဘော်သုံးဦး မြင့်မြတ်စွာကျဆုံးပြီး တစ်ဦးမစိုးရိမ်ရဒဏ်ရာရသဖြင့် ပြန်လည်ဆုတ်ခွာခဲ့ရကြောင်း အသိပေးသည်။
ထို့နောက် စစ်ကောင်စီတပ်၏ အခြားစစ်ကြောင်းတစ်ကြောင်းမှာ ခမောင်းတောင်ကျေးရွာဘက်မှ တောင်မင်းပြောင်ကျေးရွာဘက်သို့ စစ်ကြောင်းထိုးလာရာ ဗထူးစစ်ကြောင်းမှ ရဲဘော်များက အသင့်စောင့်စိုင်းပြီး အင်အားပြင်းမိုင်းလေးလုံးနှင့် တပြိုင်နက်ဖောက်ခွဲတိုက်ခိုက်ခဲ့သည်ဟု ဆိုသည်။
ဖောက်ခွဲတိုက်ခိုက်မှုကြောင့် စစ်ကောင်စီတပ်မှ ၁၀ ဦးခန့်သေပြီး ၂၀ကျော်ထိခိုက်ဒဏ်ရာရသွားကာ ဗထူးစစ်ကြောင်းမှ ရဲဘော်များ အထိအခိုက်မရှိခဲ့ကြောင်း ဖော်ပြသည်။
အလားတူ ယင်းနေ့(ဇူလိုင် ၂၂)နေ့လယ် ၁ နာရီခန့်တွင် စစ်ကောင်စီတပ်၏ လှုပ်ရှားစစ်ကြောင်းတစ်ခုသည် တောရှည်ရွာဘက်မှ ဖွားဘုတ်ပြင်ကျေးရွာဘက်သို့ လက်နက်ကြီးများဖြင့် ရမ်းသမ်းပစ်ခတ်နေစဥ် ဗထူးစစ်ကြောင်းမှ ရဲဘော်များက ဒရုန်းဖြင့် ဗုံးသီးရှစ်လုံး၊ (၇၉)မမအလုံး ၆၀ တို့ဖြင့် နာရီဝက်ကြာ ပစ်ခတ်တိုက်ခိုက်ခဲ့ရာ စစ်တပ်ဗိုလ်ကြီးတစ်ဦးမျက် နှာထိမှန်၍ ခြောက်ဦးထက်မနည်း ထိခိုက်သွားကြောင်း အသိပေးသည်။
“ကျနော်တို့ ပွဲဖြစ်ခဲ့တဲ့ တချို့နေရာတွေမှာ နယ်မြေရှင်းလင်းရေး လုပ်နိုင်ခဲ့ပြီ။ အကုန်လုံးတိုးပြီးတော့ မလုပ်နိုင်သေးဘူး။ ဘာကြောင့်လည်းဆိုတော့ (စစ်ကောင်စီတပ်)တချို့အဲဒီနေရာတွေမှာ ဆက်ရှိနေသေးတယ်ဗျ”ဟု တိုက်ပွဲဖြစ်ပွားပြီး နောက်ဆက်တွဲအခြေအနေအား ဗထူးစစ်ကြောင်းတွင်ပါဝင်သည့် လောင်းလုံး(ပကဖ)မှ တာဝန်ရှိသူတစ်ဦးက People’s Spring သို့ ပြောသည်။
ထို့အပြင် တိုက်ပွဲများဖြစ်ပွားပြီး နောက်တစ်ရက် ဇူလိုင် ၂၃ တွင် တောင်မင်းပြောင်ကျေးရွာသို့ရောက်ရှိနေသည့် စစ်ကောင်စီတပ်စစ်ကြောင်းသည် မြို့ဟောင်းကျေးရွာဘက်သို့ထွက်လာစဥ် တိုက်ခိုက်ရန်ပြင်ဆင်ထားသော်လည်း ဒေသခံပြည်သူများအားဖမ်းဆီး၍ လူသားဒိုင်းအဖြစ်ခေါ်ဆောင်လာသဖြင့် မတိုက်ခိုက်ဘဲ ပြန်လည်ဆုတ်ခွာခဲ့ရသည်ဟု ဗထူးစစ်ကြောင်းက ဆိုသည်။
“တောင်မင်းပြောင်ရွာခံတွေက ဟိုကောင်တွေ(စစ်ကောင်စီတပ်)ထွက်သွားပြီထင်ပြီး ရွာထဲပြန်ဝင်ကြတာ။ အဲအချိန်မှာ ရွာထဲကျန်နေတဲ့ကောင်တွေက ပြည်သူတွေကိုဖမ်းပြီး ဓားစာခံအဖြစ်ခေါ်သွားတာဗျ။ ဟိုဘက်(မြို့ဟောင်းရွာ)ရောက်တဲ့အချိန်မှာတော့ ပြန်လွှတ်ပေးလိုက်တယ်”ဟု ဗထူးစစ်ကြောင်းတွင်ပါဝင်သည့် လောင်းလုံး(ပကဖ)မှ တာဝန်ရှိသူတစ်ဦးက ရှင်းပြသည်။
လက်ရှိအခြေအနေတွင် စစ်ကောင်စီတပ်နှင့် ထိတွေ့တိုက်ပွဲများ ဆက်လက်ဖြစ်ပွားခြင်းမရှိသော်လည်း နခံတောအပါအဝင် ကျေးရွာအချို့တွင် စစ်တပ်စစ် ကြောင်းအချို့ ဆက်ရှိနေခြင်းကြောင့် တိုက်ပွဲများအချိန်မရွေးထပ်မံဖြစ်ပွားနိုင်၍ ပြည်သူများသတိပြုနေထိုင်ကြရန် ဗထူးစစ်ကြောင်းက အသိပေးထား သည်။
လောင်းလုံးမြို့နယ်အတွင်း စစ်ရေးလှုပ်ရှားမှုများလုပ်ဆောင်လျှက်ရှိသော ဗထူးစစ်ကြောင်းတွင် လောင်းလုံးမြို့နယ် ပြည်သူ့ကာကွယ်ရေးတပ်ဖွဲ့ (ပကဖ)၊ Dawei Guerrilla Revolutionary Force(DGRF)၊ YPPDF နှင့် ရေဖြူ(ပကဖ)တို့ ပါဝင်သည်။
