ဖားကန့်မြို့နယ် ဆိုင်းတောင်ကျေးရွာအတွင်း ယမန်နေ့က တိုက်ပွဲတွင် ပြည်သူတစ်ဦး သေနတ်ကျည်ဆန်ထိမှန်ခဲ့ပြီး ယနေ့နံနက်တွင်လည်းစစ်ကောင်စီတပ်က စစ်ကြောင်းထိုးရန် ပြင်ဆင်နေကြောင်း ဒေသခံများကပြောသည်။
ဆိုင်းတောင်ကျေးရွာတွင် KIA၊PDF ပူးပေါင်းတပ်ဖွဲ့နှင့် စစ်ကောင်စီတပ် အောက်တိုဘာလ ၃ရက် နေ့လယ် ၁၂ နာရီခွဲခန့်မှ စ၍ ညပိုင်းအထိတိုက်ပွဲဖြစ်ပွားခဲ့သည်။
တိုက်ပွဲအတွင်း စစ်ကောင်စီက လက်နက်ကြီးဖြင့် ပစ်ခတ်၍ နေအိမ်အချို့ မီးလောင်ပျက်စီးခဲ့သလို ဆိုင်းတောင်ရပ်ကွက်ထဲမှ အသက် ၃၀အရွယ်ခန့်အမျိုးသားတစ်ဦးမှာလည်း သေနတ်ကျည်ဆန်ထိမှန်သေဆုံးခဲ့ကြောင်း ဒေသခံများကပြောသည်။
ဆိုင်းတောင်ဒေသခံတစ်ဦးက “သေဆုံးတာက ကျတော့် သူငယ်ချင်းပါ။ ဘယ်ဖက်က ပစ်လိုက်တဲ့ ကျည်ဆန်လဲတော့ မသိပါဘူး။ မနေ့က တိုက်ပွဲမှာတော့ စစ်တပ်ဖက်က လမ်းထိပ်ကနေ ပရမ်းပတာပစ်နေတာပါ” ဟု ပြောသည်။
သေနတ်ကျည်ဆန်ထိမှန် သေဆုံးသူ၏ နာရေးကို ယနေ့(အောက်တိုဘာလ ၄ရက်) နေ့လည်တွင် ပြုလုပ်ခဲ့သည်ဟု သိရသည်။
Public Service Announcement
ယနေ့တွင်လည်း စစ်ကောင်စီတပ်ဖွဲ့ဝင်အများအပြားသည် ဆိုင်းတောင်ကျေးရွာအတွင်း အရပ်ဝတ်ဖြင့်ရော ၊စစ်ယူနီဖောင်းဖြင့်ပါ ရောက်ရှိနေသည်ဟု ဒေသခံများကပြောသည်။
” ပစ်ခတ်သံတော့ မကြားရသေးဘူး။ စစ်ကြောင်းထိုးမယ်လို့ သိရတယ်။ ဈေးထဲလည်း လူမရှိတော့ဘူး။ ကျောင်းတွေလည်း ပြန်လွှတ်တာတွေ ရှိတယ်”ဟု ဒေသခံတစ်ဦးကပြောသည်။
ယမန်နေ့တိုက်ပွဲတွင် နှစ်ဘက်ထိခိုက် သေဆုံးမှုများရှိပြီး ၊စစ်ကောင်စီတပ်မှ ကားနှင့် လက်နက်ခဲယမ်းအချို့ကို KIAနှင့် PDF တို့က သိမ်းဆည်းရရှိခဲ့ကြောင်း ဒေသခံသတင်းရင်းမြစ်အချို့ကပြောသည်။
