မန္တလေးတိုင်း၊ စဥ့်ကူးမြို့နယ်၊ မိုးကုတ် – မန္တလေးလမ်းမပိုင်းတွင် ပျုစောထီးအဖွဲ့ဝင်များ လိုက်ပါလာသော ယာဥ်တစ်စီးအား PDFများက တိုက်ခိုက်ခဲ့ရာ ယာဥ်တိမ်းမှောက်ပြီး ထိခိုက်သေဆုံးမှုရှိကာ သေနတ်တစ်လက်သိမ်းဆည်းနိုင်ခဲ့ကြောင်း ဒေသတွင်းတော်လှန်ရေးအင်အားစုများက ပြောသည်။
အောက်တိုဘာ ၂ ရက် ညနေ ၄ နာရီခွဲခန့်က စဉ့်ကူးမြို့နယ်၏ ပျူစောထီးခေါင်းဆောင်မောင်နိုင်ဦးဆောင်သည့်အဖွဲ့လိုက်ပါလာသော ယာဥ်တစ်စီးအား ငွေတောင်ရွာနှင့်ညောင်ဝန်းကျေးရွာကြားတွင် မိုင်းဆွဲတိုက်ခိုက်ခဲ့ကြောင်း ဒေသတွင်းတော်လှန်ရေးအင်အားစုများက ပြောသည်။
![(တိမ်းမှောက်သွားသောယာဥ်နှင့် သိမ်းဆည်းရမိသောသေနတ်အား တွေ့ရစဥ်။ ဓာတ်ပုံ-Singu Guerillas Force-SGF)](https://i0.wp.com/www.ludunwayoo.com/wp-content/uploads/2023/10/385915994_656794533186009_7195416231981207470_n.jpg?resize=720%2C960&ssl=1)
မိုင်းထိ၍ ယာဥ်တိမ်းမှောက်သွားပြီးနောက် ပစ်ခတ်တိုက်ခိုက်ခဲ့ရာ ပျူအုပ်စုထိခိုက်သေဆုံးမှုရှိပြီး လက်လုပ် တစ်လက်၊ ကာဘိုင်ကျည်ဘောက် တစ်ခုနှင့် ကာဘိုင်ကျည် ၂၀တောင့်တို့ သိမ်းဆည်းနိုင်ခဲ့ကြောင်း Singu Guerillas Force-SGF အဖွဲ့က အသိပေးသည်။
“မိုင်းဆွဲပြီးမှ ပစ်ခတ်တာ။ အရှည်၈လက်နဲ့ဝိုင်းဗျင်းတာ။”ဟု ပါဝင်တိုက်ခိုက်ခဲ့သည့် ရဲဘော်တစ်ဦးက ပြောသည်။
အဆိုပါ ယာဥ်ပေါ်တွင် ပျူစောထီး ခုနစ်ဦးပါရှိကြောင်း ကင်းထောက်မြေပြင်သတင်းအဖွဲ့မှ ဗိုလ်ကင်းက ပြောသည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
Public Service Announcement
“ဒီနေ့စုံစမ်းတာ ခြောက်ဦးသေတယ်လို့ သိရတယ်။ ငနိုင်ကတော့ဆေးရုံမယ်။ မန္တလေးနဲ့ပြင်ဦးလွင်ဆေးရုံရောက်လားမသိဘူး”ဟု ဗိုလ်ကင်းကဆိုသည်။
စက်တင်ဘာ ၂၇ ရက် နံနက်ပိုင်းကလည်း မိုးကုတ် – မန္တလေးလမ်းပေါ်၌ အင်အား ၅၀ ကျော် ရှိသည့် ရေနံ့သာရဲစခန်းအား ဒေသတွင်းPDFများက Fixed Wing ဒရုန်းများဖြင့် သုံးကြိမ်တိုင် ဗုံးသီးချတိုက်ခိုက်ခဲ့သေးသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)