ထီးချိုင့်မြို့နယ် မင်းဝံတောင်ရိုး၌ ယနေ နေ့လယ်ဖြစ်ပွားသော တိုက်ပွဲတွင် စစ်ကောင်စီဘက်၌ သေဆုံးသူများပြားခဲ့ပြီး အထိနာသောကြောင့် စစ်တပ်ကလေကြောင်းမှတိုက်ခိုက်ကြောင်း သတင်းရရှိသည်။
“မင်းဝံတောင်ရိုးက ညောင်ပင်သာနဲ့ ဒိုးပင်ကြားမှာ ချတာ။ စကစကဘက်က တော်တော်လေး သေတယ်။ လေကြောင်းကနေ ဟတ်စကီးနဲ့ရော သုံးကြိမ်ပစ်သွားတယ်” ဟု ပြည်သူ့ကာကွယ်ရေးတပ်ဖွဲ့ဝင်တဦးကပြောသည်။
ညောင်ပင်သာနှင့် ဒိုးပင်ရွာကြားမှ စစ်ကောင်စီစစ်ကြောင်းနှစ်ကြောင်းကို KIA၊PDFပူးပေါင်းတပ်ဖွဲ့က ပိတ်ဆို့တိုက်ခိုက်ခဲ့ခြင်းဖြစ်သည်။
နံနက် ၉နာရီခန့်မှ ညနေ ၃နာရီခန့်အထိ တိုက်ပွဲဖြစ်ခဲ့ပြီး စစ်ကောင်စီစစ်ကြောင်းနှစ်ကြောင်းလုံး မြေပြင်၌ ပိတ်မိသွား၍ လေကြောင်းမှ လာတိုက်ခိုက်ခြင်းဟု ပြည်သူ့ကာကွယ်ရေး ရဲဘော်တဦးကပြောသည်။
ယင်းနေရာသို့စစ်ကူလာသည့် ခြေလျင်စစ်ကြောင်းကိုလည်း ထီးချိုင့်မြို့ ကြက်သွန်ခင်းရွာအနီးတွင် KIA၊PDFပူးပေါင်းတပ်ဖွဲ့က ကြားဖြတ်တိုက်ခိုက်ခဲ့သည်။ ယနေ့ ထီးချိုင့်တိုက်ပွဲ၌ စစ်ကောင်စီဘက်တွင် ၃၀ ဦးထက်မနည်း သေဆုံးနိုင်သည်ဟု ပြည်သူ့ကာကွယ်ရေး ထောက်ပို့ရဲဘော်က ပြောသည်။ ယနေ့ညနေပိုင်းတွင်လည်း.စစ်တပ်က တိုက်လေယာဥ်ဖြင့် ၂ ကြိမ် ဗုံးကြဲတိုက်ခိုက်ကြောင်းသိရသည်။
Public Service Announcement
ထီးချိုင့်မြို့တွင် ပြီးခဲ့သည့် အောက်တိုဘာ ၁၉ ရက် ညနေက လမ်းမပေါ် ဆိုင်ကယ်များဖြင့်ထွက်လာသည့်စစ်ကောင်စီတပ်ဖွဲ့ဝင်များနှင့် ရဲတပ်ဖွဲ့ဝင်များကိုKIA၊PDFပူးပေါင်းတပ်ဖွဲ့ကတိုက်ခိုက်ခဲ့ရာ စစ်ကောင်စီဘက်မှ ရှစ်ဦးသေဆုံးပြီး ရဲနှစ်ဦးကို အရှင်ဖမ်းမိခဲ့သည်။
အောက်တိုဘာလ ၁၃ရက်နံနက်ကလည်း ထီးချိုင့်မြို့နယ် ပျဉ်းစုရွာအနီးတွင် အင်အား ၁၃၀ ခန့်ပါ စစ်ကောင်စီစစ်ကြောင်းကိုKIA၊PDF ပူးပေါင်းတပ်ဖွဲ့က ပိတ်ဆို့တိုက်ခိုက်ခဲ့သည်။
တိုက်ပွဲ၌ စစ်ကောင်စီဘက်မှာ ၂၀ ဦးထက်မနည်း ထိခိုက်သေဆုံးခဲ့ပြီး စစ်ကောင်စီက လေကြောင်းအသုံးပြုတိုက်ခိုက်ခဲ့ရသည်။ပြီးခဲ့သည့် ဩဂုတ်လ၂၀ရက်ရက်နှင့် ဩဂုတ်လ၂၁ရက်က ထီးချ်ိုင့်မြို့နယ်၊ကွင်းကြီးရွာအနီး တိုက်ပွဲတွင် KIA၊PDF ပူးပေါင်းတပ်ဖွဲ့၏ ပိတ်ဆို့တိုက်ခိုက်မှုကြောင့် စစ်ကောင်စီ စစ်ကြောင်းမှူးအပါအဝင် စစ်ကောင်စီတပ်ဖွဲ့ဝင် ကိုးဦးသေဆုံးပြီး ၁၅ဦးထက်မနည်း ဒဏ်ရာအပြင်းအထန်ရရှိသွားခဲ့သည်။ ထို့အပြင် စစ်ကောင်စီ တပ်ခွဲမှူးတစ်ဦးအရှင်ဖမ်းမိခဲ့သည်။
” ဒီနေ့ ရှမ်းမြောက်စစ်ဆင်ရေးက ကျတော်တို့ကို မိုတီရစေတယ်။ အောင်ပွဲအတွက် ကျတော်တို့အသင့်ရှိနေတယ် ” ဟု ပြည်သူ့ကာကွယ်ရေးရဲဘော်တစ်ဦးက ပြောသည်။
