▪︎ဖောင်းဆိုင်တိုက်ပွဲမှ တင့်ကား၊ သံချပ်ကာယာဉ် ၄စီးသိမ်းနိုင်ခဲ့၍ ‘၁၀၂၇ စစ်ဆင်ရေး’အတွင်း တင့်ကားနှင့် သံချပ်ကာယာဉ် ၆စီးရရှိ
ရှမ်းပြည်နယ်မြောက်ပိုင်း မုံးကိုးဒေသ ဖောင်းဆိုင်စစ်ကောင်စီစခန်းကို ကိုးကန့်တပ်မတော် (MNDAA)က စခန်းသိမ်းတိုက်ခိုက်ခဲ့ရာ ယမန်နေ့တွင် စခန်းကို သိမ်းပိုက်နိုင်ခဲ့ပြီး သံချပ်ကာယာဉ်နှင့် တင့်ကားများကို သိမ်းဆည်းရရှိခဲ့သည်ဟု စစ်ရေးသတင်းရင်းမြစ်က ပြောသည်။
“မုံးကိုးမြို့နယ် ဖောင်းဆိုင် စကစ ဗျူဟာကုန်းစခန်းကို မနေ့ညက MNDAA တပ်ဖွဲ့တွေအပြီး တိုင်သိမ်းပိုက်နိုင်ခဲ့ပြီ။ ဖောင်းဆိုင်က စကစ စစ်သားတွေ မုံးကိုးမြို့ ဗျူဟာစခန်းကို ထွက်ပြေးသွားကြပြီ။ ဒီမနက် မုံးကိုးမြို့ ဗျူဟာကုန်းစခန်းကို ဝင်သွားကြပြီ။ဖောင်းဆိုင်ရှိ Tank ကား ၄စီးကို MNDAAက သိမ်းပိုက်ဖျက်ဆီးလိုက်ပါပြီ။ အရင် ရတာ ၂စီးနဲ့ဆို ၆စီးဟုတ်တယ်”ဟု စစ်ရေးသတင်းရင်းမြစ်က ပြောသည်။
ညီနောင်မဟာမိတ်သုံးဖွဲ့က ဖောင်းဆိုင်မြို့ကို အောက်တိုဘာ ၃၀ရက် ညနေ ၆နာရီတွင် သိမ်းပိုက်ရရှိပြီဖြစ်ကြောင်း အသိပေးထားသော်လည်း တိုက်ပွဲသတင်းအပြည့်အစုံနှင့် လက်နက်ခဲယမ်းများ၊ စစ်သုံးယာဉ်များ သိမ်းဆည်းရရှိမှု အခြေအနေ အသေးစိတ်ကို ထုတ်ပြန်ခြင်းမရှိသေးပေ။
စခန်းသိမ်းတိုက်ပွဲဆင်နွှဲခဲ့သည့် MNDAAတာဝန်ရှိသူကို ဆက်သွယ်ပြီး သံချပ်ကာယာဉ်နှင့် တင့်ကားများ သိမ်းဆည်းရရှိမှု အခြေအနေကို မေးမြန်းထားဆဲဖြစ်သည်။
ယမန်နေ့က ထွက်ပေါ်လာသည့် တိုက်ပွဲသတင်းရုပ်သံတွင် စစ်ကောင်စီသံချပ်ကာယာဉ်၊ တင့်ကား ၂စီးတို့ကို မဟာမိတ်တပ်များက သိမ်းပိုက်ထားနိုင်သည်ကိုတွေ့ရသည်။ ၁၀၂၇ စစ်ဆင်ရေးစတင်ခဲ့ပြီးနောက်ကိုးကန့် ခရိုင်အတွင်း တိုက်ပွဲများ၌ စစ်ကောင်စီ၏ ဗျူဟာမြောက်လက်နက်များ၊ စစ်သုံးယာဉ်များ ၊ ခဲယမ်း၊ ကျည်များစွာကို မဟာမိတ်တပ်ဖွဲ့များက သိမ်းပိုက်ရရှိထားသည်။
Public Service Announcement
