မကွေးတိုင်း၊ ရေနံချောင်းမြို့နယ် ယာကြီးပြင်ကျေးရွာရှိ စစ်ကောင်စီ စစ်ဆေးရေးဂိတ်အား PDF သုံးဖွဲ့ပူးပေါင်း တိုက်ခိုက်ခဲ့ကြောင်း သတင်းရရှိသည်။
အောက်တိုဘာ ၂၉ ရက် ည၁၁နာရီခန့်က ပူးပေါင်းတပ်ဖွဲ့သည် မြို့ရှောင်လမ်းပေါ်ရှိ စစ်ကောင်စီတပ်သား ငါးဦးခန့်ရှိသော ယာကြီးပြင်ဂိတ်အား ပစ်ခတ်တိုက်ခိုက်ခဲ့ကြောင်း Chauk Guerilla Force(C.G.F)အဖွဲ့၏ ခေါင်းဆောင် ဗိုလ်ပေတက ပြောသည်။
အဆိုပါ ဂိတ်အားပစ်ခတ်တိုက်ခိုက်ပြီးမကြာမီ ကင်းလှည့်ယာဥ်နှစ်စီး စစ်ကူရောက်လာ၍ မိနစ်၃၀ကြာ ဆက်လက်တိုက်ခိုက်ခဲ့သည်ဟု PDF ပူးပေါင်းအဖွဲ့က ဆိုသည်။
“ရေနံချောင်းနဲ့ မကွေးကိုသွားတဲ့လမ်းပေါ်က ယာကြီးပြင်ရွာက ဂိတ်ပါ။ ကျွန်တော်တို့ကတော့ အပြီးအပြတ်စီးနင်းချေမှုန်းဖို့ သွားတာပါ။ သူတို့ဘက်ကအလွယ်တကူစစ်ကူရောက်လာတဲ့အတွက် ကျွန်တော်တို့ပြန်ဆုတ်ခဲ့တာ။ ကျွန်တော်တို့က သူတို့ကင်းပုန်းဝပ်နိုင်လောက်တဲ့နေရာ ခြံစည်းရိုးနားတွေအထိ ချည်းကပ်နိုင်ခဲ့တယ်။”ဟု Chauk Guerilla Force(C.G.F)အဖွဲ့၏ ခေါင်းဆောင် ဗိုလ်ပေတက ပြောသည်။
အဆိုပါဂိတ်သည် ဖြတ်သန်းသွားလာသည့် ပြည်သူများ၏ယာဥ်များအား စစ်ဆေးငွေတောင်းခံလေ့ရှိကြောင်း ဒေသခံအချို့က ပြောသည်။
![Public Service Announcement](https://i0.wp.com/www.ludunwayoo.com/wp-content/uploads/2022/08/PSA_Inside-Story_Landmines.jpg?resize=880%2C446&ssl=1)
Public Service Announcement
ယင်းစစ်ဆင်ရေးအား Chauk Guerilla Force(C.G.F) ချောက်မြို့နယ်ပြောက်ကျားတပ်ဖွဲ့၊ ချောက်(ပကဖ)၊ မကွေးခရိုင် အမှတ်(၂)တပ်ရင်း တို့ ပူးပေါင်းတိုက်ခိုက်ခဲ့ခြင်းဖြစ်သည်။
ယာကြီးပြင် စစ်ဆေးရေးဂိတ်သည် ဇွန်လ ၁၆ရက် နံနက်ပိုင်းကလည်း ဗုံးပစ်တိုက်ခိုက်ခံခဲ့ရသေးသည်။
![](https://i1.wp.com/ludunwayoo.com/wp-content/uploads/2021/08/banner-logo1-50px.png)