သြဂုတ်-၂၄၊၂၀၂၅။လူအေး/People’s Spring
ကျောက်မဲမြို့နယ်၊နောင်ပိန်ရွာ၊ရပ်ကွက်(၄)အတွင်း ဝင်ရောက်လာသည့်စစ်တပ်စစ်ကြောင်းက ဒေသခံများအား သေနတ်ဖြင့်ပစ်ခတ်သတ်ဖြတ်သွား၍ ထိခိုက်သေဆုံးမှုများရှိခဲ့ပြီး ရွာကိုပိတ်ဆို့ထားကြောင်း ဒေသခံအချို့ကပြောသည်။
နောင်ပိန်တိုက်နယ်၊ရပ်ကွက်(၄)သို့ စစ်တပ်စစ်ကြောင်းက ဩဂုတ်လ ၂၃ရက်နံနက်ပိုင်းတွင် ဝင်ရောက်လာပြီး ရွာအတွင်းပိတ်မိနေသောအရပ်သားများအားပစ်ခတ်သွားခြင်းဟု ဒေသခံအချို့ကပြောသည်။တိုက်ပွဲများစတင်ဖြစ်ပွားပြီးနောက်ဒေသခံများမှ ဘေးလွတ်မည်ထင်ရာသို့ထွက်ပြေးကြသော်လည်း ပိတ်မိနေသူများလည်းရှိနေခြင်းဖြစ်သည်။
“ဒေသခံတွေကထွက်လို့အချိန်မမှီတော့စုပြီးနေကြတာ။စက်သေနတ်နဲ့ပတ်ပြီးပစ်တာပါ။ကလေးတွေလည်းဒဏ်ရာရတယ်။ထိခိုက်တာများတယ်။ အတည်ပြုထားနိုင်တာကတော့ ၃ ယောက်သေဆုံးတယ်။ ရွာကို ကယ်ဆယ်ရေးအဖွဲ့တွေကိုမဝင်ခိုင်းဘူးတပ်ကပိတ်ထားတယ်”ဟုနောင်ပိန်ဒေသခံတဦးကပြောသည်။
Public Service Announcement
ထို့အပြင်စစ်ကောင်စီသည်နောင်ပိန်တိုက်နယ်အတွင်း TNLAတပ်ဖွဲ့ဝင်များ ယခင်ကလာရောက်ခဲ့ဖူးသည့်ရွာများကို စီနင်းတိုက်ခိုက်နေပြီး နေအိမ်များအားမီးရှို့ဖျက်ဆီးနေသည်ဟု ဒေသခံများကပြောသည်။
“TNLAတွေ စျေးလာဝယ်ဖူးတဲ့ရွာကိုလေကြောင်းကနေလည်းပစ်တယ်။စစ်ကြောင်းလည်းထိုးတယ်။စစ်တိုက်နေတာ မဟုတ်ဘူး။ အရပ်သားတွေကိုသတ်နေတာ” ဟု နောင်ပိန်ဒေသခံတစ်ဦးကပြောသည်။
မြေပြင်စစ်ကြောင်း စီနင်းတိုက်ခိုက်နေသည့် ရပ်ကွက်(၄)အတွင်း ဒဏ်ရာရပြည်သူများသည်သြဂုတ်လ၂၄ရက်အထိ ထွက်ခွင့်မရသေးသလို ဆေးကုသခွင်လည်း မရပေ။ ဖုန်းလိုင်းအဆက်အသွယ်များပြတ်တောက်နေ၍ ၎င်းတို့၏အခြေအနေကိုအသေးစိတ်မသိရှိရကြောင်း အခြားဒေသသို့စစ်ရှောင်နေသည့် နောင်ပိန်ဒေသခံတစ်ဦးကပြောသည်။
နောင်ပိန်တိုက်နယ်ခေါ် နောင်ပိန်ရွာအတွင်းတိုက်ပွဲစတင်ဖြစ်ပွားခဲ့သည့် သြဂုတ်လ၁၉ရက်နေ့မှစ၍ စစ်ကောင်စီက လေကြောင်းရောလက်နက်ကြီးပါအသုံးပြု၍ပစ်ခတ်ခဲ့ပြီးသြဂုတ်လ၂၄ရက်တွင်လည်း စစ်ကြောင်းထိုးနေကြောင်းသတင်းရရှိသည်။
မြေပြင်စစ်ကြောင်းမထိုးခင် ဩဂုတ်လ ၁၉ရက်မတိုင်ခင်ကလည်း လေကြောင်းနှင့်လက်နက်ကြီးမကြာခဏပစ်ခတ်ခဲ့၍ အရပ်သားထိခိုက်သေဆုံးမှုရှိခဲ့သည်။ဩဂုတ်လ၂၀ရက်နေ့ကလေကြောင်း
တိုက်ခိုက်မှုသည် လူသေဆုံးထိခိုက်မှုအများဆုံးဖြစ်ခဲ့ပြီး နောင်ပိန်ရွာမှ ကလေးငယ်အချို့အပါအဝင် အရပ်သား၁၀ဦးထက်မနည်းသေဆုံးကာ ၄၀ နီးပါးဒဏ်ရာရခဲ့သည်။
ဩဂုတ်လ ၂၁ရက်၊၂၂ရက်နှင့် ၂၃ရက်ကလည်း Y12လေယာဉ်ဖြင့် ဗုံးအလုံးရေ ၅၀နီးပါးကြဲခဲ့ပြီး ဂျက်ဖိုက်တာဖြင့်လည်းဗုံးကြဲ၍ အရပ်သားများသေဆုံးထိခိုက်မှုရှိခဲ့သည်။ လက်ရှိအခြေအနေတွင် ဖုန်းလိုင်းနှင့်အင်တာနက်လိုင်းအခက်အခဲများကြောင့်အရပ်သားထိခိုက်မှုစာရင်းကို အသေးစိတ်အတည်မပြုနိုင်သေးပေ။
လတ်တလောအခြေအနေများကြောင့် နောင်ပိန်တိုက်နယ်အတွင်း ကျေးရွာပေါင်း၂၁ ရွာမှ ဒေသခံ ၁၀,၀၀၀ ကျော် ထွက်ပြေး တိမ်းရှောင်နေကြရသည်။ စစ်ကောင်စီမြေပြင်စစ်ကြောင်းများရှိနေခြင်းနှင့် တိုက်ပွဲဖြစ်ပွားနေခြင်းတို့ကြောင့် ကူညီကယ်ဆယ်ရေး နှောင့်နှေးနေကြောင်း လူမှုကူညီ ရေးအဖွဲ့များကပြောသည်။
