ဆီမီးထွန်းနေချိန် ဗုံးကြဲခံရမှုမှာ စစ်ကိုင်းတိုင်းဒေသ သပိတ်အင်အားစုကရဲဘော် ၂ဦးကျဆုံး

အောက်တိုဘာ-၇၊၂၀၂၅။ဇေအောင်/People’s Spring

စစ်ကိုင်းတိုင်း၊ ချောင်းဦးမြို့နယ်မှာသီတင်းကျွတ်လပြည့်ညမှာ ဆီမီးထွန်းနေချိန် စက်တပ်လေထီးနဲ့ ဗုံးကြဲတိုက်ခိုက်ခံရမှုမှာ စစ်ကိုင်းတိုင်းဒေသ သပိတ်အင်အားစုက ရဲဘော်ချမ်းငြိမ်းအောင် နဲ့ ရဲဘော်ညီညီဇော်တို့ ကျဆုံးခဲ့ပါတယ်။

စစ်ကိုင်းတိုင်းဒေသ သပိတ်အင်အားစုက လူထုတိုက်ပွဲ မြှင့်တင်ရေးကော်မတီမှ ရဲဘော်ချမ်းငြိမ်းအောင်၊ ဘဏ္ဍာရေးကော်မတီမှ ရဲဘော်ညီညီဇော်တို့ဟာအောက်တိုဘာ ၆ ရက် ည ၇ နာရီမှာ ကျဆုံးခဲ့ကြောင်း စစ်ကိုင်းတိုင်းဒေသ သပိတ်အင်အားစုက ထုတ်ပြန်ပါတယ်။

၎င်းတို့ ၂ ဦးဟာမုံရွာ-အမြင့်လမ်းသပိတ်ဦးဆောင်ကော်မတီမှာလည်း ပါဝင်ခဲ့ပြီး ချောင်းဦးနဲ့ မုံရွာအစပ်က တနေရာမှာ ပြည်သူတွေနဲ့အတူ ဆီမီးထွန်းနေချိန် စက်တပ်လေထီးနဲ့ ဗုံးကြဲတိုက်ခိုက်မှုကြောင့် ကျဆုံးခဲ့ရခြင်းဖြစ်ကြောင်း နီးစပ်သူတွေက ပြောပါတယ်။

Public Service Announcement

ရဲဘော် ချမ်းငြိမ်းအောင်နဲ့ ရဲဘော်ညီညီဇော်တို့ဟာ ပြည်သူလူထု အကျိုးအတွက် အကြမ်းမဖက် လူထုလှုပ်ရှားမှုများကို အစဥ်တစိုက်လုပ်ကိုင်ဆောင်ရွက်ခဲ့တဲ့ ရဲဘော်တွေအဖြစ်လည်းကောင်း၊ နွေဦးတော်လှန်ရေးမှာ ပေးအပ်တဲ့ လုပ်ငန်း တာဝန်များကိုတာဝန်ကျေပွန်စွာအစဥ်တစိုက်လုပ်ကိုင်ဆောင်ရွက်ခဲ့တဲ့ ရဲဘော်တွေအဖြစ်လည်းကောင်း နွေဦးတော်လှန်ရေး သူရဲကောင်းတွေအဖြစ် ဂုဏ်ယူစွာ မှတ်တမ်းတင် ဂုဏ်ပြုကြောင်း စစ်ကိုင်းတိုင်းဒေသ သပိတ်အင်အားစုက အသိပေးပါတယ်။

သူတို့နှစ်ဦး ယုံကြည်ကြိုးပမ်းတိုက်ပွဲဝင်ခဲ့တဲ့ ဖယ်ဒရယ်ဒီမိုကရေစီ နိုင်ငံတော်အသစ်တရပ် တည်ဆောက်နိုင်ရေးအတွက် သပိတ်အင်အားစုက ရဲဘော်တွေဟာ ပန်းတိုင်ရောက်တဲ့အထိ ဆက်လက်ချီတက်သွားမယ်လို့ စစ်ကိုင်းတိုင်းဒေသ သပိတ်အင်အားစုက ထပ်မံအသိပေးပါတယ်။

ကျဆုံးသူတွေထဲမှာ ကလေးသူငယ်တွေနဲ့ အရပ်သားပြည်သူတွေလည်း ပါဝင်ခဲ့ပါတယ်။​အောက်တိုဘာ၇ ရက် ညဦးပိုင်းရတဲ့သတင်းအရ ​ပြည်သူ ၂၄ ဦး​သေဆုံးပြီး​တော့ ၄၀ ကျော် ဒဏ်ရာရတယ်လို့အမျိုးသားညီညွတ်​ရေးအစိုးရမှ တာဝန်ရှိသူ တဦးက​ပြောပါတယ် ။ ​သေဆုံးဒဏ်ရာရသူဟာ ဒီထက်လည်း ပိုများနိုင်တယ်လို့ သူကဆက်ပြောပါတယ်။

ထိခိုက်သူတွေကိုလည်း ဆေးဝါးကုသမှုတွေ ပြုလုပ်ပေးနေပြီးဆေးဝါး ​၊သွေးနဲ့အခြားအကူအညီတွေလည်း လိုအပ်နေတယ်လို့ ကူညီနေသူတွေက ပြောပါတယ်။