နယ်စပ်နားကို အမေရိကန် ဗုံးကြဲလေယာဉ်တွေ ချဉ်းကပ်လာတာကြောင့် တိုက်လေယာဉ်တစ်စီး အရေးပေါ် စေလွှတ်ပြီး စောင့်ကြည့်စေခဲ့ကြောင်း ရုရှား ကာကွယ်ရေး ဝန်ကြီးဌာနက ကြေညာပါတယ်။
အမေရိကန်ရဲ့ B-52H မဟာဗျူဟာ ဗုံးကြဲ လေယာဉ်ကြီး နှစ်စီးဟာ ဘောလ်တစ် ပင်လယ်ပြင်ပေါ်မှာ ရုရှားနယ်နိမိတ်ဆီ ဦးတည်ပြီး ချဉ်းကပ် ပျံသန်းခဲ့တာလို့ ရုရှားက ပြောပါတယ်။ ဒါပေမဲ့ မတ် ၂၀ ဖြစ်စဉ်မှာ အမေရိကန် လေယာဉ်တွေဟာ ရုရှား လေပိုင်နက်ကို ကျူးကျော် ထိပါးမှု မရှိခဲ့ဘူးလို့ ရုရှားက အတည်ပြုပါတယ်။
ရုရှားလေတပ်ဟာ SU-35 တိုက်လေယာဉ် တစ်စီးကို စေလွှတ်ပြီး လိုအပ်လာရင် အမေရိကန် ဗုံးကြဲလေယာဉ်တွေကို ကြားဖြတ် ဟန့်တားဖို့ နိုးနိုးကြားကြား စောင့်ကြည့်ခဲ့တယ်လို့ ဆိုပါတယ်။ နောက်ဆုံး အမေရိကန် လေယာဉ်တွေက ရုရှား ပိုင်နက်နဲ့ ဝေးရာကို ပြန်လည် ထွက်ခွာသွားမှသာ SU-35ကလည်း အခြေစိုက် စခန်းဆီ လှည့်ပြန်ခဲ့တယ်လို့ သိရပါတယ်။
ဒါဟာ ပင်လယ်နက် ရေပြင်အထက်မှာ ကင်းထောက် ပျံသန်းနေတဲ့ အမေရိကန် ဒရုန်းတစ်စီး ရုရှား တိုက်လေယာဉ်တွေနဲ့ ထိခိုက်မိလို့ ပျက်ကျခဲ့မှုအပြီး ရက်ပိုင်းလောက် အကြာမှာ နှစ်နိုင်ငံ စစ်သုံးလေယာဉ်တွေကြား နောက်တစ်ကြိမ် ထိပ်တိုက် ကြုံခဲ့တာလည်း ဖြစ်ပါတယ်။
ရုရှား ကာကွယ်ရေး ဝန်ကြီးဌာနဟာ အမေရိကန် ဒရုန်း ပျက်ကျသွားအောင် နှောင့်ယှက်ခဲ့တဲ့ SU-27 တိုက်လေယာဉ်မှူးတွေကို ဂုဏ်ပြု ဆုတံဆိပ်တွေ ချီးမြှင့်ခဲ့သေးတယ်လို့လည်း သိရပါတယ်။
