ရုရှားရဲ့ နောက်ဆုံးပေါ် အဆင့်အမြင့်ဆုံး မျိုးဆက်သစ် ဟိုက်ပါဆောနစ် ဒုံးကျည်တစ်စင်းကို အမေရိကန်ရဲ့ လေကြောင်း ကာကွယ်ရေး စနစ်သုံးပြီး ပထမဆုံးအကြိမ် အောင်အောင်မြင်မြင် ပစ်ချနိုင်ခဲ့ကြောင်း ယူကရိန်းက ကြေညာပါတယ်။
အခုသီတင်းပတ်မှာ ရုရှားက ကိယက်ဗ်မြို့တော်ကို ဦးတည် ပစ်ခတ်လိုက်တဲ့ Kh-47 Kinzhal အမျိုးအစား ဟိုက်ပါဆောနစ် ဒုံးကျည်တစ်စင်းကို အမေရိကန်လုပ် Patriot လေကြောင်းကာကွယ်ရေး စနစ်က ဟန့်တား ပစ်ချနိုင်ခဲ့တာလို့ ယူကရိန်း လေတပ်က ပြောပါတယ်။
Kinzhalဆိုတာ ရုရှားဘာသာအရ ဓားမြှောင်လို့ အဓိပ္ပါယ်ရပြီး ၂၀၁၈ ခုနှစ်မှာ ရုရှား သမ္မတ ဗလာဒီမာ ပူတင်ကိုယ်တိုင် ထုတ်ကြွားထားတဲ့ ရုရှားရဲ့ နည်းပညာမြင့် မျိုးဆက်သစ် စစ်လက်နက် ၆ ခုထဲမှာ ပါဝင်ပါတယ်။
ဟိုက်ပါဆောနစ် ဆိုတာဟာ အသံထက် အနည်းဆုံး ၅ ဆပိုမြန်တဲ့ နှုန်းနဲ့ ရွေ့လျားနိုင်တာကို ဆိုလိုတာပါ။ ပူတင်က Kinzhalတွေဟာ မြန်နှုန်းအရရော၊ နည်းပညာ အရပါ ဘယ်ရန်သူ့ လေကြောင်းကာကွယ်ရေး စနစ်မှ ကြားဖြတ် ဟန့်တား ပစ်ချဖို့ မဖြစ်နိုင်ကြောင်း ကြွေးကြော်ထားဖူးပါတယ်။
အခုတော့ ပူတင် အင်မတန် အမွှန်းတင်တဲံ Kinzhal တစ်စင်းကို အမေရိကန်က ထောက်ပံ့ထားတဲ့ Patriot လေကြောင်း ကာကွယ်ရေး စနစ်နဲ့ ကြားဖြတ် ပစ်ချလိုက်နိုင်ပြီလို့ ယူကရိန်း လေတပ် ဦးစီး အရာရှိ မိုင်ကိုလာ အိုလက်စ်ချော့ခ်က ပြောပါတယ်။ ဒီကိစ္စဟာ ယူကရိန်းအတွက် သမိုင်းဝင်မယ့် အခိုက်အတန့် တစ်ခုဖြစ်ကြောင်း၊ ကိယက်ဗ် မြို့ပြင်နားမှာ ရုရှားရဲ့ ပြိုင်ဘက်ကင်း Kinzhalကို ယူကရိန်း လေကြောင်း ကာကွယ်ရေး တပ်ဖွဲ့တွေက ပစ်ချနိုင်ခဲ့ပြီလို့ သူက Telegramမှာ ရေးသား ကြေညာခဲ့ပါတယ်။
အမေရိကန်လုပ် Patriot ဒုံးခွင်းဒုံးတွေဟာ အနောက် မဟာမိတ်တွေက ယူကရိန်းလက်ထဲ ပေးအပ်ထားတဲ့ နည်းပညာ အမြင့်ဆုံး လေကြောင်း ကာကွယ်ရေး စနစ်လို့ ဆိုနိုင်ပါတယ်။ အသံထက် ၁၀ ဆပိုမြန်အောင် ပျံသန်းနိုင်တယ်လို့ ကြွေးကြော်ထားတဲ့ သူတို့ရဲ့ Kinzhal ဒုံးကျည်ကို ယူကရိန်းက ပစ်ချခဲ့တယ် ဆိုတာနဲ့ ပတ်သက်ပြီး လောလောဆယ် ရုရှားဖက်ကတော့ ဘာမှတ်ချက်မှ မပေးသေးပါဘူး။
ရုရှားဟာ ယူကရိန်းစစ်ပွဲ အစောပိုင်း ကာလတွေတုန်းက ဟိုက်ပါဆောနစ် ဒုံးကျည် တစ်စင်းကို လက်တွေ့ ပစ်ခတ်ပြီး ဟိုက်ပါဆောနစ် လက်နက်တွေ စစ်မြေပြင်မှာ အသုံးချတဲ့ ပထမဆုံး နိုင်ငံအဖြစ် မှတ်တမ်းဝင်ခဲ့ပါတယ်။ ဒါပေမဲ့ အဲဒီတုန်းက ပစ်လွှတ်တဲ့ ဒုံးကျည်ဟာ Kinzhal မဟုတ်တဲ့ နည်းပညာပိုင်း အဆင့်ပိုနိမ့်တဲ့ အမျိုးအစားဖြစ်ပြီး ယူကရိန်းမှာလည်း Patriotစနစ် မပိုင်ဆိုင်သေးပါဘူး။
ရုရှားဟာ ယူကရိန်းရဲ့ အရပ်ဖက် ပစ်မှတ်တွေကို မတိုက်ခိုက်ပါဘူးလို့ ပြောင်ပြောင်တင်းတင်း ငြင်းဆိုရင်း လူနေ ဧရိယာတွေ၊ ဆေးရုံတွေ၊ ကျောင်းတွေနဲ့ အခြေခံ အဆောက်အအုံတွေကို ဒုံးကျည်တွေ၊ ဒရုန်းတွေနဲ့ အကြိမ်ကြိမ် ပစ်ခတ်ခဲ့တာကြောင့် ယူကရိန်း အရပ်သားပြည်သူ ရာနဲ့ချီ အသက်ဆုံးရှုံးခဲ့ရပြီး ဖြစ်ပါတယ်။
