ချားလ်စ်ဘုရင်ဟာ ဗြိတိန်ရဲ့ ထီးဆောင်းမင်းအဖြစ် မေလ ၆ ရက်မှာ အခမ်းအနားနဲ့ ခံယူခဲ့ပါတယ်။
လန်ဒန်က ဝက်စ်မင်စတာ ဘုရားကျောင်းကြီးမှာ ချားစ်ဟာ ဗြိတိန် နန်းဆက် ဘုရင်တွေရဲ့ အဆောင်အယောင်ဖြစ်တဲ့ စိန့်အက်ဒွပ် သရဖူကြီးကို နန်းတက်ပွဲ အခမ်းအနားမှာ တရားဝင် လက်ခံယူ ဆင်မြန်းခဲ့ပါတယ်။ အထူး ဖိတ်ကြားထားတဲ့ ဧည့်သည်တော် ၂၀၀၀ လောက်က သရဖူ ဆောင်းလိုက်တဲ့ ချားလ်စ်ကို တညီတညွတ်တည်း ကောင်းချီးပေး ဆုတောင်းခဲ့ကြပါတယ်။
၁၉၅၃ ခုနှစ်နောက်ပိုင်း ဗြိတိန်မှာ ပထမဆုံး တွေ့မြင်ရတဲ့ နန်းတက်ပွဲကို ကမ္ဘာ့နိုင်ငံတွေရဲ့ ခေါင်းဆောင်တွေ၊ တခြား နိုင်ငံတွေက တော်ဝင် မိသားစုဝင်တွေ တက်ရောက် ချီးမြှင့်ခဲ့ပါတယ်။ နန်းတက်ပွဲ ကျင်းပတဲ့ နေရာ အပြင်ဖက်မှာတော့ ထောင်သောင်းချီတဲ့ ပြည်သူတွေ၊ ပရိသတ်တွေနဲ့ လုံခြုံရေး တပ်ဖွဲ့ဝင်တွေ စုဝေးနေခဲ့ကြပါတယ်။
ပြီးတော့ ဘုရင်စနစ်ကို ဆန့်ကျင်သူ တချို့ကလည်း နန်းတက်ပွဲ ကျင်းပနေချိန် လန်ဒန်မှာ စုဝေး ဆန္ဒပြတာမျိုးတွေ ရှိခဲ့ပါတယ်။
နန်းတက်ပွဲ အပြီးမှာတော့ ချားလ်စ်ဘုရင်နဲ့ မိဖုရား ကယ်မီလာတို့ဟာ ဘက်ကင်ဟမ် နန်းတော်ရဲ့ လေသာဆောင်မှာ ရပ်ရင်း လာရောက် ဂုဏ်ပြု ဆုမွန်ကောင်း တောင်းပေးသူတွေကို နှုတ်ဆက်ခဲ့ပါတယ်။
နန်းတက်ပွဲ ကျင်းပချိန်မှာ ရာသီဥတုက ကြည်ကြည်လင်လင် မရှိခဲ့ဘဲ မိုးရွာနေခဲ့တဲ့တိုင် တော်ဝင်မိသားစုကို ချစ်ကြည်ညိုသူ ထောင်နဲ့ချီပြီး နန်းတက်ပွဲ ကျင်းပမယ့် နေရာတဝိုက်မှာ ရွက်ဖျင်တဲတွေ ထိုးပြီး ညအိပ် စောင့်ဆိုင်းခဲ့ကြပါတယ်။
တော်ဝင်မိသားစုရဲ့ ဝန်ထမ်းတွေနဲ့ ဘက်ကင်ဟမ် နန်းတော် တာဝန်ရှိသူတွေဟာ အခု နန်းတက်ပွဲအတွက် လပေါင်းများစွာ ကြိုတင် ပြင်ဆင်ထားခဲ့ရတာပါ။
အသက် ၇၄ နှစ်အရွယ် ချားလ်စ်ဟာ မိခင်ဖြစ်သူ အဲလိဇဘက်သ် ဘုရင်မကြီး ကွယ်လွန်ခဲ့တဲ့နောက် ပြီးခဲ့တဲ့နှစ် စက်တင်ဘာလ ကတည်းက ထီးနန်း အရိုက်အရာကို ဆက်ခံခဲ့ပေမယ့် အခုမှသာ တရားဝင် နန်းတက်ပွဲ ကျင်းပခဲ့တာ ဖြစ်ပါတယ်။
