အစ္စရေး ဝန်ကြီးချုပ် ဘင်ဂျမင် နေတန်ညာဟုက ကုလသမဂ္ဂ အထွေထွေ ညီလာခံမှာ မိန့်ခွန်း ပြောတဲ့အချိန် ခန်းမထဲကနေ သံတမန်တွေ၊ နိုင်ငံအများအပြားရဲ့ ကိုယ်စားလှယ်တွေ ထွက်ခွာသွားခဲ့ကြပါတယ်။
ဒါဟာ ဂါဇာစစ်ပွဲ အရေးနဲ့ ပတ်သက်လို့ နေတန်ညာဟု ဦးဆောင်နေတဲ့ အစ္စရေး အစိုးရရဲ့ မူဝါဒတွေ၊ လုပ်ရပ်တွေကို တိုက်ရိုက် ဆန္ဒပြတဲ့ အဓိပ္ပါယ်လို့လည်း ဆိုနိုင်ပါတယ်။ ပြီးတော့ ပါလက်စတိုင်း နိုင်ငံ ထူထောင်ရေးကို အပြင်းအထန် ကန့်ကွက်နေတဲ့ နေတန်ညာဟုအတွက် နိုင်ငံတကာ အခင်းအကျင်းမှာ မဟာမိတ်တွေ သိပ်နည်းလာပြီ ဆိုတာကို ညွှန်ပြနေတဲ့ အရှိတရား ဆန်းစစ်ချက် တစ်ခုလို့လည်း လေ့လာသူတွေက သုံးသပ်ခဲ့ပါတယ်။
အတော်ကြီး စိတ်ကသိကအောင့် ဖြစ်စရာ အခြေအနေမျိုး ကြုံခဲ့ပေမယ့်လည်း စက်တင်ဘာ ၂၆ ရက်နေ့တုန်းက အမေရိကန် နိုင်ငံ၊ နယူးယောက်မြို့မှာရှိတဲ့ ကုလသမဂ္ဂ ဌာနချုပ်မှာတော့ နေတန်ညာဟုကတော့ မျက်နှာထား မာမာနဲ့ပဲ သူ့မိန့်ခွန်း ပြောသွားခဲ့ပါတယ်။ သူက ဂါဇာမှာ အစ္စရေး အနေနဲ့ ရည်ရွယ်ထားပြီးသား အစီအမံတွေကို အထမြောက်အောင် ဆက်လုပ်မှာဖြစ်ပြီး မြန်နိုင်သမျှမြန်မြန် လက်စသပ်မယ်လို့ ဆိုပါတယ်။
နိုင်ငံတကာ အစိုးရတွေက ပါလက်စတိုင်းကို အချုပ်အခြာ အာဏာပိုင် နိုင်ငံတစ်ခုအဖြစ် စတင် သတ်မှတ်လာတဲ့ ကိစ္စကိုလည်း ကျက်သရေ ကင်းမဲ့တဲ့ လုပ်ရပ်လို့ နေတန်ညာဟုက စွပ်စွဲခဲ့ပြီး အဲဒီလောက် အကြီးအကျယ် ရူးမိုက်တာမျိုးကို အစ္စရေးက လက်သင့်ခံမှာ မဟုတ်ဘူးလို့ ပြောကြားသွားပါတယ်။
Public Service Announcement
သူက ဂါဇာမှာ အစ္စရေးစစ်တပ်က ဖြန့်ကျက် တပ်ဆင်ထားတဲ့ အသံချဲ့စက်တွေဟာ ကုလသမဂ္ဂက မိန့်ခွန်းကို တိုက်ရိုက် အသံလွှင့်နေလိမ့်မယ်လို့ ဆိုပါတယ်။ ပြီးတော့ ဟားမားစ် ပြောက်ကျားတွေ ဖမ်းဆီးထားတဲ့ ဓားစာခံတွေဆီ ရည်ရွယ်ပြီး သူတို့ကို အစ္စရေးက တစ်စက္ကန့်လေးတောင် မေ့ထားမှာ မဟုတ်ကြောင်း၊ အစ္စရေး ပြည်သူတွေဟာ ဓားစာခံတွေနဲ့အတူ အမြဲတမ်း တစ်သားတည်း ရပ်တည်နေမှာဖြစ်ကြောင်းလည်း နေတန်ညာဟုက ပြောဆိုခဲ့ပါတယ်။
သူမိန့်ခွန်း ပြောနေချိန်မှာတော့ အာရပ်နိုင်ငံတွေ၊ မွတ်ဆလင်နိုင်ငံတွေ အားလုံးနီးပါးရဲ့ ကုလသမဂ္ဂဆိုင်ရာ သံအမတ်တွေ၊ ကိုယ်စားလှယ်တွေက ခန်းမဆောင်ထဲကနေ ထွက်ခွာသွားခဲ့ကြတာ ဖြစ်ပါတယ်။ ဒါ့အပြင် ဥရောပနဲ့ အာဖရိက နိုင်ငံတချို့ကလည်း အလားတူ လုပ်ဆောင်ခဲ့ပါတယ်။
အစ္စရေးဟာ ဂါဇာမှာ လုပ်ဆောင်နေတဲ့ လွန်ကဲတဲ့ စစ်ရေး အစီအမံတွေ၊ အနောက်ဖက် ကမ်းခြေဒေသမှာ အိမ်ရာချဲ့ထွင် ကျူးကျော် အခြေချမှုတွေကြောင့် နိုင်ငံတကာ ဖိအားပေး ရှုတ်ချမှုတွေနဲ့ ရင်ဆိုင်နေရပါတယ်။
ကိုးကား: Axios
