မြို့ကြီးသုံးခုမှာ ဖြန့်ကျက်ထားတဲ့ စစ်တပ်တွေကို ပြန်ရုပ်သိမ်းမယ်လို့ အမေရိကန် သမ္မတ ဒေါ်နယ်လ်ထရမ့်က ပြောကြားခဲ့ပါတယ်။
ထရမ့်ဟာ အတိုက်အခံ ဒီမိုကရက်တစ် ပါတီ အားကောင်းတဲ့ မြို့ကြီးတချို့မှာ အမေရိကန် စစ်တပ်ရဲ့ အရန်အင်အားစုဖြစ်တဲ့ အမျိုးသား လုံခြုံရေး အစောင့်တပ်တွေကို ဖြန့်ကျက်ထားစေခဲ့ပါတယ်။
ဒီဇင်ဘာ ၃၁ ရက်နေ့မှာတော့ ထရမ့်က သူဟာ လော့စ်အန်ဂျလိစ်၊ ပို့တ်လန်းနဲ့ ချီကာဂိုတို့က တပ်တွေကို ပြန်လည် ခေါ်ယူတော့မယ်လို့ လူမှုကွန်ရက်မှာ ရေးသားခဲ့ပါတယ်။
ဒါပေမဲ့ အဲဒီမြို့တွေထဲမှာ ဒုစရိုက်မှုတွေ ပြန်လည် မြင့်တက်လာတာနဲ့ အမျိုးသား အစောင့်တပ်ဖွဲ့တွေ ပြန်ရောက်လာလိမ့်မယ်လို့ ထရမ့်က သတိပေးထားခဲ့ပါတယ်။
Public Service Announcement
ဒေသခံ လူ့အဖွဲ့အစည်း ခေါင်းဆောင်တွေနဲ့ ဒီမိုကရက်တစ် ပါတီ နိုင်ငံရေးသမားတွေက မြို့ကြီးတွေမှာ စစ်သားတွေ ဖြန့်ကျက်စေတဲ့ ထရမ့်ရဲ့ လုပ်ရပ်ဟာ လုံးဝ မလိုအပ်ကြောင်း ဝေဖန်ခဲ့ပါတယ်။ ပြီးတော့ အဲဒီ ဆုံးဖြတ်ချက်နဲ့ ပတ်သက်လို့ ဥပဒေကြောင်းအရ စိန်ခေါ် ဆန့်ကျင်မှုတွေလည်း ရှိခဲ့ပါတယ်။
ဒီမိုကရက်တစ် ပါတီဝင်တွေက ထရမ့်ဟာ ငြိမ်းချမ်းစွာ ဆန္ဒပြကြတာတွေကို ပုံကြီးချဲ့ပြီး အကြမ်းဖက် ရန်လိုမှုတွေအဖြစ် စွပ်စွဲရင်း တပ်တွေ စေလွှတ်ခဲ့တာလို့ ပြောပါတယ်။ ထရမ့်ကတော့ ရာဇဝတ်မှုတွေ မြင့်တက်လာတာကို တန်ပြန်ဖို့၊ လျှော့ချဖို့အတွက် တပ်တွေ စေလွှတ်ခဲ့တယ်လို့ သူ့ရဲ့ ဆုံးဖြတ်ချက်အပေါ် ကာကွယ် ပြောဆိုထားခဲ့ပါတယ်။
အခုတော့ ချီကာဂို၊ လော့စ်အန်ဂျလိစ်နဲ့ ပို့တ်လန်းတို့မှာ ဒုစရိုက်မှုတွေ သိသိသာသာ လျော့ပါးသွားပြီ ဖြစ်တာကြောင့် အမျိုးသား အစောင့်တပ်တွေကို ပြန်ရုပ်သိမ်းမယ်ုလိ့ ထရမ့်က လူမှုကွန်ရက်ပေါ်မှာ ရေးသားခဲ့ပါတယ်။
ဒါပေမဲ့ ဒုစရိုက်မှုတွေ တကျော့ပြန် မြင့်တက်လာရင် တပ်တွေ ပြန်လာမှာ ဖြစ်ကြောင်း၊ အဲဒီအခါ ပိုပြီး ခိုင်မာ အားကောင်းတဲ့၊ ကွဲပြားတဲ့ ပုံစံမျိုးနဲ့ ဖြန့်ကျက်တာမျိုး ဖြစ်နိုင်ကြောင်းလည်း သူက သတိပေးထားပါတယ်။
မြို့တွေထဲမှာ တပ်တွေ ဖြန့်ကျက်တဲ့ ထရမ့်ရဲ့ ဆုံးဖြတ်ချက်တွေကို ဆန့်ကျင်တဲ့ အရေးဆို တိုင်ကြားမှုတွေကို လက်ခံ ကြားနာခဲ့သမျှ တရားသူကြီးတိုင်းလိုလိုက သမ္မတဟာ လုပ်ပိုင်ခွင့် အာဏာထက်ကျော်ပြီး စစ်တပ်တွေကို အသုံးချခဲ့ကြောင်း ဆုံးဖြတ်ခဲ့ကြပါတယ်။
ဒီဇင်ဘာ ၂၃ ရက်နေ့မှာတော့ အမေရိကန် တရားရုံးချုပ်က အီလီနွိုက်စ်မှာ တပ်တွေ ဖြန့်ကျက်မယ့် ထရမ့်ရဲ့ အစီအစဉ်ကို တားဆီး ပိတ်ပင်ခဲ့ကြောင်း သိရပါတယ်။
ကိုးကား: Reuters
