အီရန်အရေးကို ကိုင်တွယ်ဖြေရှင်းရာမှာ အမေရိကန် သမ္မတ ဒေါ်နယ်လ်ထရမ့် အနေနဲ့ သံတမန်ရေး နည်းလမ်းတွေကိုပဲ ပိုပြီး ဦးစားပေးလိုကြောင်း၊ ဒါပေမဲ့ စစ်အင်အား အသုံးပြုရေး ဆိုတာကိုလည်း အမြဲ တွေးထားကြောင်း အိမ်ဖြူတော်က ခြိမ်းခြောက် ပြောဆိုသွားခဲ့ပါတယ်။
အီရန် နျူကလီးယား ထိန်းချုပ်ရေးကိစ္စအတွက် အမေရိကန်နဲ့ အီရန်တို့ဟာ ဖေဖော်ဝါရီ ၆ ရက်နေ့မှာ တွေ့ဆုံ ဆွေးနွေးမှာဖြစ်ပြီး အဲဒီအတွက် အိုမန်နိုင်ငံမှာ နောက်ဆုံးအဆင့် ပြင်ဆင်မှုတွေ လုပ်ဆောင်နေပါတယ်။ အိုမန်က အစည်းအဝေး မတိုင်ခင် တစ်ရက်အလိုမှာတော့ အိမ်ဖြူတော်က အဲဒီ ညှိနှိုင်းမှုတွေ အလုပ်မဖြစ်ခဲ့ရင် ထရမ့်က အမေရိကန်ရဲ့ စစ်အင်အားကို အသုံးချနိုင်တယ်ဆိုတဲ့ သတိပေးစကားကို ထုတ်ပြောလာတာ ဖြစ်ပါတယ်။
ဧရာမ ရေတပ်ကြီးလို့ ထရမ့်က ရည်ညွှန်းထားတဲ့ အမေရိကန် လေယာဉ်တင် သင်္ဘောကြီးတစ်စီး ဦးဆောင်တဲ့ တိုက်ရေယာဉ်အုပ်ဟာ လောလောဆယ် အရှေ့အလယ်ပိုင်း ဒေသထဲက အိန္ဒိယ သမုဒ္ဒရာ ရေပြင်မှာ ရှိနေပါတယ်။ ဒါ့အပြင် အီရန်နိုင်ငံတဝိုက် အာရပ်နိုင်ငံတွေမှာ အမေရိကန်ရဲ့ စစ်လေယာဉ်တွေကိုလည်း ထရမ့်ရဲ့ အမိန့်အရ အလုံးအရင်း ဖြန့်ကျက် အခြေစိုက်ထားပါတယ်။
အိုမန်မှာတော့ အီရန်နဲ့ အမေရိကန် ကိုယ်စားလှယ်တွေဟာ ဘယ်လို အကြောင်းအရာတွေကို ဆွေးနွေးကြမလဲဆိုတာ တိတိကျကျ မသိရသေးပါဘူး။ အမေရိကန်က အီရန်ရဲ့ ဒုံးကျည်နဲ့ လက်နက်တိုက် ကိစ္စလိုမျိုးတွေကိုပါ ထည့်သွင်း စကားပြောလိုပေမယ့် အီရန်ကတော့ နျူကလီးယား နည်းပညာ ထိန်းချုပ်ရေး တစ်ခုတည်းကိုပဲ အာရုံစိုက်လိုကြောင်း တုံ့ပြန်ထားပါတယ်။
Public Service Announcement
ရန်သူကိုပဲဖြစ်ဖြစ်၊ မဟာမိတ်ကိုပဲဖြစ်ဖြစ် ပြဿနာတစ်ခုခု ကြုံလာတဲ့အခါ အရင်ဆုံး သံတမန်ရေးအရ ဖြေရှင်းဖို့ ဆိုတာဟာ သမ္မတ ထရမ့်ရဲ့ အမြဲတမ်း ဦးစားပေး ရည်ရွယ်ချက် ဖြစ်တယ်လို့ အိမ်ဖြူတော် ပြောရေးဆိုခွင့်ရ အမျိုးသမီး ကာရိုလိုင်း လီယာဗစ်က သတင်းထောက်တွေကို ပြောကြားခဲ့ပါတယ်။
သူက အီရန်အပေါ် ထရမ့်ရဲ့ တောင်းဆိုမှုဟာ နျူကလီးယားနဲ့ ပတ်သက်လို့ သုညမှတ်အထိ စွန့်လွှတ်ရမယ်ဆိုတဲ့ သဘောထားကနေ အလျှော့ပေးမှာ မဟုတ်ကြောင်းလည်း ထပ်လောင်း အတည်ပြုသွားပါတယ်။ သမ္မတ ထရမ့်အနေနဲ့ သဘောတူညီမှု တစ်ခုခု ရလာဖို့ကိုပဲ မျှော်လင့်နေကြောင်း၊ အဆင်မပြေရင်တော့ စစ်ရေးကိစ္စ အပါအဝင် တခြားရွေးချယ်စရာတွေကို စဉ်းစားမှာဖြစ်ကြောင်း လီယာဗစ်က သတိပေးသွားပါတယ်။
အီရန်က ပုဂ္ဂိုလ်တွေ အနေနဲ့ အမေရိကန် ကာကွယ်ရေး ဝန်ကြီးချုပ်ဟာ ကမ္ဘာ့သမိုင်းမှာ စွမ်းအားအမြင့်ဆုံး စစ်တပ်ကြီးကို အမိန့်ပေးခွင့် ရှိနေတယ်ဆိုတာ မမေ့ကြဖို့ သူမျှော်လင့်ကြောင်းလည်း လီယာဗစ်က ပြောပါတယ်။ အမေရိကန်မှာ သမ္မတဟာ ကာကွယ်ရေး ဦးစီးချုပ် ဖြစ်ပါတယ်။
အီရန် အစိုးရကတော့ နိုင်ငံခြားရေး ဝန်ကြီး အဘက်စ် အာရက်ချီဟာ အိုမန်မှာ အစည်းအဝေးတက်ဖို့ ဖေဖော်ဝါရီ ၅ ရက်နေ့က ထွက်ခွာသွားကြောင်း ကြေညာထားပါတယ်။ အာရက်ချီဟာ မျှတပြီး နှစ်ဖက်စလုံးက လက်ခံနိုင်တဲ့၊ ဂုဏ်သိက္ခာရှိတဲ့ သဘောတူညီမှု တစ်ခုခုကို ရှာဖွေလာနိုင်ဖို့ မျှော်လင့်နေကြောင်း အီရန် အစိုးရက ထုတ်ပြန်ပါတယ်။ သူဟာ မတ်စ်ကက်မြို့မှာ ထရမ့်ရဲ့ အထူးကိုယ်စားလှယ် စတိဗ်ဝစ်ကော့ဖ် ဦးဆောင်တဲ့ အမေရိကန် အဖွဲ့နဲ့ တွေ့ဆုံ ဆွေးနွေးမှာ ဖြစ်ပါတယ်။
ကိုးကား: Reuters
