اطلاعات روز: د طالبانو مرستیال ویاند حمدالله فطرت وایي، چې د کونړ په نورګل، څوکۍ او ماڼوګي ولسوالیو کې د نړېدلو کورونو د پلټنې پر مهال نور جسدونه را ایستل شوي او په دې سره د مړو شمېر دوه زره او ۲۰۵ او د ټپیانو شمېر درې زره او ۶۴۰ تنو ته لوړ شوی دی.
نوموړي دغه ارقام نن (پنجشنبه، ۱۳ د وږي) ماسپښین په خپله ایکس پاڼه خپاره کړي او ویلي دي، چې د کونړ په نورګل ولسوالۍ مزار درې، د څوکۍ ولسوالۍ ډيوه ګل درې او چپې درې او د ماڼوګي ولسوالۍ په زلزله ځپلو سیمو کې د پلټنې او ژغورنې په عملياتو کې د سلګونه تنو جسدونه را ايستل شوي دي.
فطرت زیاتوي، چې د ژغورنې او پلټنې هڅې لا هم دوام لري او په بېلابېلو سيمو کي خلکو ته خيمې نصب شوي او د لومړنيو او عاجلو مرستو انتقال په منظم شکل جريان لري.
تېره ورځ د طالبانو ویاند ذبیح الله مجاهد وویل، چې د یکشنبې شپې زورورې زلزلې یوازې په کونړ ولایت کې د ښځو او ماشومانو په ګډون ۱۴۵۷ تنه مړه او ۳۳۹۴ نور ټپیان کړي دي.
په ورته مهال کونړ کې زلزله ځپلي شکایت کوي، چې د طالبانو له لوري په زلزله ځپلو سیمو کې د ژوند ژغورنې عملیات پڅ روان دي او ځینو سیمو لا هم عملیاتي ټیمونه نه دي رسیدلي او خلک تر خاورو لاندې دي.
ځايي سرچینو نن سهار مهال اطلاعات روز ته وویل، چې د نورګل ولسوالۍ د مزار درې په شولت سیمه کې لا هم د ژغورنې عملیات نه دي پیل شوي او خلک تر خاورو لاندې دي.
سرچینې وايي، که څه هم سیمې ته ورغلې لارې خرابې دي؛ خو د طالبانو له لوري بشري قوه کافي نه ده چې له امله یې شولت سیمه کې خلک تر خاورو لاندې او احتمال شته چې ګڼو ټپیانو خپل ژوند له لاسه ورکړی وي.
کونړ کې د تېرې یکشنبې شپې د زلزلې له امله د تلفاتو شمیر داسې مهال لوړ شوی، چې د نن سهار راهیسې کونړ او ننګرهار دوه ځلي زلزلې لړزولي او په دې سره خلک نور هم ویریدلي دي.