Azərbaycanın Maliyyə Nazirliyi bugünlərdə ölkənin xarici dövlət borcunun 9.4 milyard dollar civarında olduğuna dair məlumat yaydı. Lakin belə məlum olur ki, Maliyyə Nazirliyi məbləği 2 dəfədən də çox aşağı göstərib. Belə ki, ABŞ Mərkəzi Kəşfiyyat İdarəsinin (CİA) məlumat bazasında Azərbaycanın xarivi borcu 20 milyard dolları keçib. Bu barədə iqtisadçı ekspert Qubad İbadoğlu özünün feysbukda hesabında yazıb.
“Maliyyə Nazirliyi xarici borcların həcmi ilə bağlı yeni məlumat yayıb. Əgər həmin məlumata inansaq, 01 yanvar 2018-ci il tarixinə Azərbaycan Respublikasının xarici dövlət borcu 9,398.3 milyon ABŞ dolları (15,978.1 milyon manat), xarici dövlət borcunun Ümumi Daxili Məhsula (ÜDM) olan nisbəti 22.8 faiz təşkil edib.
Dünyanın mötəbər statistik mənbələrindən sayılan CİA-nın məlumatına görə, 2017-ci ildə Azərbaycanın dövlət borcunun ÜDM-də payı 48,8 faiz olub. 2017-ci il üçün hesablanmış ÜDM-in 70,135.1 milyon manat təşkil etdiyini nəzərə alanda, dövlət borcunun Maliyyə Nazirliyinin açıqladığı kimi 15,9 milyard manat deyil, 34,2 milyard manat və yaxud hazırkı məzənnə ilə 20,1 milyard dollar olduğu məlum olur. Belə olan halda Azərbaycanda doğulan hər bir uşaq 2054 dollar və ya 3490 manat borcla dünyaya gəlir.
Orta statistik ailənin (4,5 nəfərlik ev təsərrüfatının) borcu isə 9243 dollar və ya 15705 dollar təşkil edir. Burda diqqəti çəkən əsas məqamlardan biri də odur ki, dövlət borcunun ÜDM-də payı kritik hesab edilən 40 faizi ötməsi və son illər onun artım tempinin sürətlənməsidir. Məlumat üçün qeyd edim ki, dövlətin borcuna hökumətin birbaşa öhdəlikləri və dövlət zəmanətilə cəlb edilmiş kreditlər daxil edilir. Yəni bu halda neft şirkətinin dövlət zəmanəti olmadan aldığı borclar hesablanmış məbləğə daxil deyildir”, – deyə Q.İbadoğlu qeyd edib.
Oxunub: 734
