Parlamentin birinci vitse-spikeri Ziyafət Əsgərov özünü növbəti dəfə rüsvay eləyib
Milli Məclisin bugünki iclasında parlamentin birinci vitse-spikeri Ziyafət Əsgərov müxalifətin 19 oktyabr mitinqdən danışıb. Z.Əsgərov çıxışında hər zaman olduğu kimi müxalifəti, mitinq təşkilatçılarını sərt tənqid edib. Sitat: “Bu illər ərzində doğrudanmı sizdə inkişaf yoxdur? Bu illər ərzində nə işlə məşğul olmusunuz? Əşşi, Azərbaycan kosmik dövlətdir. Ölkədə bir sıra beynəlxalq yarışlar yüksək səviyyədə keçirilib. Ölkədə Qoşulmama Hərəkatına üzv olan dövlətlərin toplantısı olacaq. Vacib idimi belə bir vəziyyətdə siz metronun yanında qarışıqlıq yaradasınız? Azərbaycan vətəndaşı öz dövlətçiliyinə qarşı bu qədərmi asi kəsilər? Mən başa düşürəm ki, sizin sifarişçiləriniz var. Siz onları yerinə yetirməlisiniz. Amma siz Azərbaycan vətəndaşısınız. Azərbaycan bundan sonra da lap güclü şəkildə inkişaf edəcək.
Qanunvericilikdə də mitinqin keçirilməsi yerləri ilə bağlı məhdudiyyət var. Sən kimsən hakimiyyət üstünə gedəsən? Bizə Avropadan çağırışlar var. Əvvəla, bizlə diktəylə danışmayın. Siz gedin Londonda, Barselonada olan biabırçılıqları araşdırın. Sonra bizlə söhbət edərsiniz. Dəfələrlə demişik ki, bizimlə diktə dilində danışmayın. Biz Azərbaycan dövlətçiliyini, İlham Əliyevi göz bəbəyi kimi qoruyacağıq. Bu dövlətin fundamenti 12 ballıq zəlzələyə hesablanıb, 13-cüsü yoxdur. Əli Kərimlinin keçmişini hamı bilir. Heç olmasa gənclərə yazığınız gəlsin”.
Z.Əsgərov qeyd edib ki, bütün millət vəkillərinin çıxışları, səsləri burada yazılır. Kim istəsə, götürüb paylaşa bilər: “Siz gəlib burada selfi çəkdirib özünüzü reklam etmək istəyirsinizsə, bu, sizin probleminizdir. Bura selfi çəkmək yeri deyil. Bura qanunverici orqandır”.
İndi isə Sizə təqdim etdiyimiz bu 2 fotoya diqqət yetirin. Bu fotolar iki il öncə – 2017-ci ilin sentyabrında Prezident İlham Əliyevin Birləşmiş Millətlər Təşkilatının ali tribunasında çıxışı zamanı çəkilib. Ölkə başçısı mötəbər tribunadan Qarabağ münaqişəsindən danışarkən onu izləyən böyük qızı Leyla Əliyeva öncə prezidentin videosunu, daha sonra isə öz selfie-sini çəkib.
İlham Əliyevin Xocalı soyqırımında öldürülən qadın və uşaqların sayından danışan zaman Leyla Əliyevanın bu hərəkətləri həmin vaxt sosial şəbəkələrdə xeyli müzakirə mövzusu olmuşdu.
Qeyd edək ki, Prezident İlham Əliyev həmin iclasa həyat yoldaşı, 1-ci Vitse-prezident Mehriban Əliyeva və qızı, Heydər Əliyev Fondunun vitse-prezidenti Leyla Əliyevayla birgə qatılmışdı.
İndi sual olunur: Ziyafət bəy, ölkə başçısının qızına BMT-də selfi çəkdirmək olar, bizimkilərə Milli Məclisdə olmaz?
Azər