Milli Məclislə Prezident Administrasiyasının davası boylarını o qədər aşıb ki, artıq şikayət üçün gələnləri də bir-birilərinin üstünə qaldırırlar. Deputatlar deyir ki, bu nifrət İlham və Mehriban Əliyevlərdən gələn nifrətdi. Məsələn, qapıya gələn şikayətçiləri dinləyib problemlərinə yardımçı olmaq əvəzinə, günahı atırlar bir-birilərinin üstünə. Bu yolla insanların dərdlərini də öz aralarında olan hakimiyyət didişməsinə vasitə edirlər. Yaxın günlərdə Gəncə məhbuslarının valideynləri MM-ə yürüş etmişdi. Yürüşdə onlarla qadın parlamentin qarşısına kimi “azadlıq”, “balalarımızı azad edin” şüarları səsləndirərək, həbs olunmuş övladlarının buraxılmasını tələb etmişdilər. Canlı yayımda jurnalistlərə müsahibə verən qadınlardan biri deyir ki: “MM-ə dərdimizi deməyə gəlmişik. Deputatlar bizim səsimizi eşitməlidir. Xalq onları ona görə seçib, xalqın dərdinə yansınlar. Amma bir dəfə də bizim harayımızı eşitmədilər. Maraqlanmadılar ki, bu həbs olunan insanların günahı var, yoxsa yox. Parlament xalqın sözünü deyən dövlət qurumudur. Bizi dinləyib, dərdimizi məclisdə qaldırmaq yerinə, deyirlər tapşırıq başdan gəlib, Prezident Administrasiyasından.” Ölkənin durumu bu, deputat seçicisini başından eləmək üçün “onları prezident tutdurub, biz yox, onların üstünə gedin” deyirsə, gerisini özünüz düşünün.
Gəncə hadisələri zamanı həbs olunan insanların başına gətirilənlər böyük insanlıq faciəsidir. Orda insanlara edilən işgəncələr heç quldarlıq dövründə qullara da edilməyib. Onlarla günahsız insanı içəri doldurub, zülm ediblər. İşgəncəyə məruz qalanların yaxınları şikayət etməyə adam, dərdlərini anlatmağa ünvan gəzirlər aylardır. Qapı-qapı dolaşan çarəsiz analar təkrar qayıdıblar MM-in qapısına. Kim eşidəcək onları, bəlkə Rəsulzadəni ən nalayiq sözlərlə təhqir edən Gəncə deputatı Naqif Mirzəyev? Axı o özü elə sabiq icra başçısı Elmar Vəliyevin ən yaxın adamıdır. Bəs başqa deputatlar, onlardan hər hansı dəstək gözləməyə dəyərmi? Axı o parlamentdə xalqın səsi ilə seçilən neçə deputat var ki, onlardan imdad ummağa dəysin? Neçə deputat zəhmət çəkib alnının təriylə mandat alıb ki, xalqa ürəyi yansın? Neçə deputat qapı-qapı gəzib seçici ilə görüşüb ki, onların dəyərini anlasın? Bunların dərdi ədalət, qanun, xalq, dövlətçilik deyil, analar, onlardan yaxşı heç nə gözləməyin. Onların tək dərdi əllərindəki mandatı uzun illər ərzində qoruyub saxlamaq və vaxtını uzatmaqdır. Bu məqsədləri üçün illər boyu hər pisliyi qəbul etdi bu adamlar. Hakimiyyət daxilindəki savaşları, didişmələri də məhz öz maraqları üçündür. Siz onlardan ədalət gözləməyin. Ədaləti bu ölkəyə siz özünüz gətirməlisiniz. Etiraz səsinizi ucaldaraq, haqqınızı beynəlxalq məhkəmələrə daşıyaraq, fəal etirazçı təşkilatların aksiyalarına qoşularaq gətirməlisiniz. Bunun başqa yolu yox. Gəncə məhbusların ailələri də narahat olmasınlar-gəlin qoşulum bizim etirazlarımıza, diktator devriləndən sonra bu problem də olmayacaq.