Milli Şuranın sədri Cəmil Həsənli
Ermənistanda hüququn pozulmasından “narahat” olan İlham Əliyev siyasi baxışlarına görə Milli Şuranın rəhbərliyində təmsil olunan Qarabağ döyüşçüsü Tofiq Yaqublunu qurama bir ittihamla həbs etdirib. Tofiq bəy Əliyevin pandemiyanı öz əleyhdarlarına və tənqidçilərinə qarşı yönəltməsinin ilk hədəfidir. Əliyevlərin ailə şirkətində işləyən bir nəfər onun park olunmuş vəziyyətdə maşınını vurub özünü “günahkar” çıxarıblar. İstintaq başa çatıb. Bu işin müstəntiqi də, şahidi də, dövlət ittihamçısı və hakimi də İlham Əliyev özüdür. Böyük Fizuli demiş, “Hökm onun hökmü, fərman onun fərmanıdır”.
Artıq istintaq (əslində isə məzhəkənin birinci seriyası) başa çatıb. İstintaq materialları ilə tanış olan Tofiq bəy deyib ki, “Əlavə “şahidlər və xəsarətlərlər”lə cinayət işinin içi zənginləşdirilib. Özümü saxta ittihamlarla cinayət və inzibati həbslərə məruz qalmaq üzrə rekordçu hesab edirəm. Məncə, bu gerçək faktdır. Odur ki, saxta ittihamlar və yalançı şahidlərlə üzləşməkdə çox geniş təcrübəm var. Cəsarətlə deyə bilərəm ki, indiki kimi absurd, vicdansız, həyasız, ləyaqətsiz və haqsız suçlama ilə üzləşməmişəm. Bu siyasi sifarişi verənlərin və onu icra edənlərin nə qədər şərəfsiz və layaqətsiz olduqlarına adekvat ifadə tapa bilmirəm. Səbirsizliklə məhkəməni gözləyirəm. İlham Əliyev görəcək ki, onun bu qanunsuz sifarişini yerinə yetirənlər şərəfsiz olmaqla yanaşı həm də kütbeyin və cahildirlər. Əslində bu cinayət işi özlərinin iflasıdır. “
Ölkədə yaratdığı bu hüquqi rəzaləti ört-basdır etməkdən ötürü İlham Əliyev Ermənistanda insan hüquqlarının pozulmasından danışır. Yeri gəlmişkən bu məsələdə Paşinyan İlham Əliyevin müxalifətçiləri şərləyib tutdurmaq, öz əleyhdarlarına ssenariləşdirilmiş cinayət işləri quraşdırmaq, dövlətin resursların namuslu vətəndaşlara qarşı səfərbər etmək sahəsində zəngin “təcrübəsinə” ancaq həsəd apara bilər.