Ilham Hüseyn
Bəzi adamlara reaksiya vermək lazım deyil. Çünki belələri reaksiyadan stimul alır və elə bilirlər ki, hansısa çəkiyə malikdilər. Reallıq isə budur ki, belə adamların siyasi-mənəvi çəkisini tərəzi göstərmir, çox yüngüldülər.
Amma sosial şəbəkələr elə vəziyyət yaradıb ki, “buqələmun siyasətçilər” özlərinə “çəki yapışdırmaq” dələduzluğuna girişiblər. Belə olan halda cavab verməyə ehtiyac duyursan ki, alıcılar aldanmasın.
Məsələn, Ədalət müəllimin “dialoq seminarı” ndan yenicə qayıtmış bir partiya sədri var. Partiyasında özündən başqa heç kimi tanımırıq. Bəli, adam özündən ibarət olan partiyanın sədridi. Bu adam daha çox hökumətə “saxta müxalifəti necə yaratmaq olar” mövzusunda təkliflər paketi təqdim etməsiylə yadda qalıb. Son “performans”ı isə prezidentin yaxasına medal asdığı qəzetçini mədh etməkdən ibarət olub. İndi bu məxluq özün öldürür ki, mən müxalifət lideriyəm, mübarizi adamıyam və s.
Di gəl ki, israrla Əli Kərimlinin internet blokadasında olmasını danır, bu fakta inanmır. Bəli, bu “mübarizə mələyi” DİN-in mətbuat xidmətinin, Mirşahinin dediklərini təkrarlayır. Yəni, o biri dostları kimi müxalifətə müxalifət olmaq kursun götürüb.
Əli bəyin evindən “Meydan tv”-nin, “Azad söz”ün, “Azərbaycan saatı”-nın və digər internet televiziyalarının əməkdaşları reportaj ediblər, müsahibə götürüblər və təsdiqləyiblər ki, blokada qüvvədədi.
Amma nə hikmətdirsə, Ədaləti görəndən sonra həqiqəti görməmək dəbə çevrilib.
Bu rejimin cəbhəçilərə, Əli Kərimliyə bugünə qədər etdiklərinin yanında, internet blokadası nədir ki, buna inanmırsız? Cəbhəçilər yutubda canlı yayımlara çıxana qədər, repressiyalardan, işgəncələrdən keçiblər.
Cənablar, müxalifətçilik təkcə pencək düymələyib, ekrandan aqressiv görünüb, beşinci dərəcəli məmura od püskürməkdən ibarət deyil. Artıq bu üsullarla xalqı aldatmaq mümkün deyil. Bir dəfə siyasi məhbus məsələsin dilinə gətirməyən, hökumətin hədəf seçdiyi adamları hədəf seçən “lider”, ancaq PA- nın mövsümi lideri ola bilər.
Ya özünüz sandığınıza girin, ya da xalq sizi o sandığa tullayacaq. Gedin, dialoq libası geyinmiş monoloqunuzla məşğul olun. Əslində, mənəvi blokadada olan adamların, müxalifət liderinin informasiya blokadasında olmağına inanmaması təbiidir.
Sadəcə olaraq imanın və inamın PA-ya bağlamış adamların həqiqi kimliyin cəmiyyətə göstərmək üçün yazmağa məcbur qalırıq.
Əli Kərimlinin blokadada olmağına inanmayanların sayı, sənin müxalifət lideri olduğuna inananların sayı qədərdi.