Milli Şuranın sədri Cəmil Həsənli
Hakimiyyət natəmiz əməllərindən əl çəkmir. Milli Şuranın rəhbər heyətində təmsil olunan Tofiq Yaqublu ilə bağlı baş verənlər bunun aydın ifadəsidir. Harın bir polis işçisinin Salyanda yerli bir ailənin namusuna təcavüz etdiyinə etiraz səsini ucaltdığından Xalq Cəbhəsinin rayon təşkilatının fəalı Əlizamin Salayev məhkəmənin hazırlıq iclasında həbs edilmişdi. Ölkənin məhkəmə təcrübəsində bu birinci rüsvayçı özbaşınalıq idi. İlham Əliyev hüquqi dövlət vəd etməklə Azərbaycan məhkəmələrin ağayi Xalxalinin məhkəmələrinə döndərdi.
İndi də millətin namusunu çəkən Tofiq Yaqublu üçün belə bir oyun qururlar. Tofiq bəy İlham Əliyevin 19 martda müxalifət əleyhinə bəyan etdiyi anti-milli doktrinanın təhdidi altında həbs edilib. Onu həbs etmək üçün heç bir əsas yoxdur. Sadəcə olaraq polisin öncədən hazırladığı ssenari əsasında Əliyevlərin ailə şirkətində işləyən Elxan Cəbrayılov Tofiq bəyin park olunmuş vəziyyətdə olan maşınını vurmuş və sonra da məlum ssenari əsasında DİN-in maskasını geymiş həyat yoldaşı Cəvahir Cəbrayılova ilə birlikdə ailəvi şəkildə Tofiq bəyin üzünə durmuşdur.
Təəssüf ki, konstitusyon nəzarətdən çıxıb dövləti qorumaq əvəzinə hakim ailənin keşikçisinə çevrilmiş daxili işlər orqanları belə natəmiz əməllərlə məşğul olur və hələ bütün bunlar azmış kimi özlərinin qabaqcadan hazırladığı saxta əməliyyatı istintaq dövründə yeni natəmiz çalarla zənginləşdirirlər. İlham Əliyev namuslu, vətənpərvər, Qarabağ döyüşlərindən keçmiş Tofiq Yaqublu kimi adamları belə saxta ittihamlarla həbs etdirməkdən nə usanır, nə də utanır. O, unudur ki, vaxtı ilə Səddam Hüseyn də, Kaddafi də, Hüsnü Mübarək də belə natəmiz yollarla haqq sözü deyənləri susdururdu, hazırda Bəşər Əsəd və Kim Çen Ində belə edir. İlham Əliyev diktator və müstəbid olduğunu sübut etmək üçün bütün iyrənc vasitələrdən istifadə edir. Məhz belə əməllər onu və rəhbərlik etdiyi kleptokratik rejimi xalqın gözündən salmış, millətin nifrət hədəfinə çevirmişdir.
Bu ölkənin namuslu vətəndaşları olan Saleh Rüstəmli, Tale Bağırzadə, Babək Həsənli, Aqil Əli Məhərrəm, Fuad Əhmədli, Abbas Hüseyn, Orxan Baxışlı, Elçin İsmayıllı, Ziya Əsədov və onlarla digərləri Əliyev rejiminin ssenariləşdirdiyi saxta cinayət işlərinin nəticəsi kimi bu gün zindan həyatı yaşayır. İndi bu siyahıya Əliyev müstəbidliyinin bütün natəmiz tərəflərini öz həyatında yaşamış, öz dərisində hiss etmiş Tofiq Yaqublu yenidən əlavə edilir. Əliyev zaman-zaman belə adamları həbs edib onlardan alver predmeti kimi istifadə edir. İndi görən Tofiq Yaqublunun əzabları hesabına o, Qərb liderlərindən kimin əlini “sıxmağın” cizgisini çəkir?