“Qarabağ yürüşü”ndə iştirak etdiyinə, və ya işrirak ehtimalına görə saxlanılan şəxslərin bir çoxuna sonradan İnzibati Xətalar Məcəlləsinin 211.1-ci maddəsi ilə karantin qaydalarını pozma ittihamı verilib və barələrində 30 sutka inzibati həbs cəzası seçilib. Siyasi kimliyi olan həmin şəxslərin əksəriyyəti müəyyən edilib və yaxınları vasitəsi ilə onların müdafiəsi təşkil olunub. Hazırda Binəqədi rayonu ərazisindəki İnzibati Həbs Olunanların Saxlama Məntəqəsində 15 nəfərdən artıq AXCP üzvünün inzibati həbs cəzası çəkdiyi məlumdur. Onlardan bəziləri müdamadi olaraq Baş Prokurorluğun İstintaq İdarəsinə, Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinə aparılıb dindirilmələri barədə məlumatlar var. Nicat Abdulllayev, Elnur Yusubov , Mahir Namazov, Fərrux Əliyev və digərləri onlara qarşı bu tip dindirilmələr aparılması barədə yaxınlarına məlumat veriblər.
Barəsində Səbail Rayon məhkəməsinin qərarı ilə 30 sutka İnzibati həbs qərarı seçilmiş AXCP Abşeron Rayon Şöbəsinin üzvü Rəhimov Feyruz Namizəd oğlu ilə bağlı vəziyyət daha mürəkkəb vəziyyət alıb. Belə ki, avqustun 5-də vəkil İnzibati həbs olunanlarla görüş üçün Saxalama Məntəqəsinə gedib. Digər şəxslərlə görüşsə də, Rəhimov Feyruzun istintaq İdarəsinə aparıldığı bildirilib. Növbəti gün bir daha görüşə gedib və yenə də onun Saxlama məntəqəsində olmadığı məlum olub. Vəkilin Ombudsman Aparatı ilə əlaqə yaratmasından sonra Rəhimov Feyruzun Saxlanma Məntəqəsində olması bildirilib və görüşə biləcəyi deyilib. Avqustun 7-də vəkil İnzibati Həbs Olunanların Saxlama Məntəqəsinə gedib, Rəhimov Feyruz Namizəd oğlu ilə görüşə gəldiyini bildirib. Növbətçi polis Rəhimovun vəkildən İmtina etdiyini, ərizəsinin gətirilib təqdim ediləcəyini deyib. Vəkil imtinanın prosedur qaydaları çərçivəsində həyata keçirilməli olduğunu xatırlatdıqda növbətçi polislər rəislə əlaqə saxlayıb. Bundan sonra vəkil görüş otaqları olan dəhlizə aparılıb. Rəhimov Feyruz isə həmin dəhlizə bitişik digər dəhlizə gətirilib, qapını açaraq “vəkil xidmətinə ehtiyacı olmadığını və hüquqlarını özü qoruyacağını” bildirib. Bu cür görüşə vəkil etiraz edib, daha yaxından konfidensial görüş şəraitinin yaradılmasını tələb etsə də əhəmiyyət verilməyib, bildirilib ki, rəisin göstərişi belədir. Onu da qeyd edək ki, həmin koridorlar kameralar ilə müşayət olunur.
Avqustun 6-da Fuad Qəhrəmanlının əvvəllər yaxından tanıdığı, xoş münasibətdə olduğu vəkildən imtina etməsi, bu gün isə bu addımı Rəhimov Feyruzun təkrarlaması ortada işgəncə faktlarının , saxlanılanlara qarşı təzyiq olması ehtimalını artırır. Ardıçıl olaraq iki gün Feyruz Rəhimovun Saxlanma Məntəqəsində olmaması, harasa aparılması, fiziki işgəncə tətbiq etməklə kiməsə qarşı etirafedici ifadələr verməsi şübhələrini güçləndirir. Bu səbəbdən onun vəkildən imtina etdirilməsi əməliiyatı düşünülmüş şəkildə həyata keçirilib.
azadliq.info