AXCP Rəyasət Heyətinin üzvü Fuad Qəhrəmanlı
Xankəndində erməni gənclərə təhlükəsizlik təlimi keçən rus hərbiçisi qondarma rejimin bayrağını Rusiyanın bayrağı ilə yanaşı qoyub.
Əvvəla, bu nə təlimdir?
Belə çıxır ki, Ruslar ermənilərə hərbi təlim keçməklə, onların hərbi hazırlığını artırmaqla məşğuldurlar. Belə sülhməramlılıq olar? Ruslar hansı əsasla mandatlarına daxil olmayan bu işlə məşğuldurlar? Bu açıq şəkildə Azərbaycan dövlətinin təhlükəsizliyinə və suverenliyinə qarşı təxribatdır.
Digər tərəfdən isə, Dağlıq Qarabağdakı qondarma hakimiyyətin bayrağını, Rusiya bayrağı ilə yanaşı qoymaq, açıq şəkildə separatçıları de – fakto tanımaq anlamına gəlir. Çünki təlimdə iştirak edən hərbiçi rəsmi olaraq Rusiya ordusunu təmsil edir. Bu üzdən də işğalçı rejimin bayrağını Rusiya bayrağı ilə yanaşı qoymaq, onu dövlət kimi qəbul etmək anlamına gəlir.
Bu da Rüstəm Muradovun hərbi cani Araiklə qucaqlaşıb öpüşməsi deyil ki, məsələyə şəxsi münasibət kontekstindən baxılsın. Azərbaycan tərəfi ağzına su alıb durduqca, Rusiya dövlət suverenliyimizə qarşı saymazyana və hörmətsiz münasibətini daha da artırır.
Ona görə də dərhal bu hadisə rəsmi səviyyədə pislənilməli, Rusiyadan izahat istənilməlivə Azərbaycanın dövlət suverenliyinə hörmət tələb olunmalıdır.