AXCP Rəyasət Heyətinin üzvü
Bu gün “Azadlıq” qəzetinin 31 yaşı tamam olur. “Azadlıq”da ilk məqaləm 1994 – cü ildə çap olunub. O vaxtdan başlayaraq “Azadlıqla” yol yoldaşlığım ta qəzetin çapı dayandırılana qədər davam etdi.
“Azadlıq” o illərdə siyasətə gəlmək istəyənlərin həm də cəmiyyətə təqdimat platforması idi. Yetişməkdə olan yeni nəsil siyasətçilər üçün ideoloji siyasi məktəb rolunu oynayırdı.
Nəşr olunduğu illərdə “Azadlığın” ən böyük dəyəri avtoritar rejimin zorakılıq və təzyiqləri qarşısında, azad sözü, prinsipial tənqidi qoruyub saxlaması və özlüyündə bir mübarizə cəbhəsi olmasında idi.
“Azadlıq” öz tarixində heç vaxt bir partiyanı təmsi etmədi, səsi boğulan, susdurulmağa çalışılan hər kəsin yanında yer alıb bütöv bir millətin mübarizə səlnaməsini yaratdı.
“Azadlıq” fəaliyyət göstərdiyi illərdə, həm də siyasətin əxlaq kriteriyalarına müəyyənləşdirir, siyasi oportunizmlə prinsipial mübarizənin sərhədlərini qoruyurdu.
“Azadlıq” təkcə qəzetçilik deyildi, həm də bir missiya idi. O missiya ki, onun uğrunda yüz illərdir insanlıq dayanmadan ən ağır məhrumiyyətlərə rəğmən mübarizə aparır, ağır qurbanlar verir və sonunda bir dəyər kimi onu öz həyatında gerçəkləşdirməyə nail olur. Bu səbəbdən dir ki, bu gün dünyamızda azad ölkələrin sayı, diktatura və avtoritarizmin zorakılığı və qadağaları altında buxovlanan ölkələrin sayından qat qat çoxdur.
Və “Azadlığın” bu gün qəzet kimi çapı dayandırılsa da, o bir missiya kimi azad olmaq istəyənlərin mübarizəsində, düşüncəsində davam edir. Bu gün feysbuk səhifəsi ilə yola davam edən “Azadlıqğın” günün birində yenidən nəşrə başlayacağı gün uzaqda deyil.