AXCP sədri Əli Kərimli
Cümhuriyyət bayramınız mübarək, əziz həmvətənlər!
Böyük milli liderimiz M.Ə.Rəsulzadə və silahdaşları 103 il bundan öncə Azərbaycan dövlətinin qurulduğunu bütün dünyaya bəyan etdilər.
Qurucu babalarımız yoxdan bir bayraq, dağınıq bir ərazidən dövlət qurdular. Həm də elə bir dövlət ki, xalqa xidmət üçün quruldu. Xalqın mənafeyindən özgə bir mənafeyə xidmət etmədi.
Qurucu babalarımız qurduqları dövlətin sayəsində varlanmadılar. Varislərinə var-dövlət və vəzifə miras qoymadılar. Tam əksinə, bu müqəddəs yolda şəxsi sərvətlərini, canlarını, ailələrini qurban verdilər. Ancaq millətimizə işıqlı bir ideal olaraq Azərbaycan dövlətini əmanət etdilər. 103 il bundan öncə Azərbaycanda məhz demokratik bir dövlət qurmaqla dünya xalqları arasında xalqımızın başını uca etdilər. Xalqımız bu gün də həmin qüruru yaşayır. Qurucu babalarımız qaldırdıqları üçrəngli bayrağımızı gənclərimizə əmanət edib, onu heç vaxt endirməməyi xalqımıza vəsiyyət etdilər. Azərbaycan əsgər və zabitlərinin canlarını fəda edərək, işğal olunmuş torpaqlarımızın böyük bir hissəsində bayrağımızı yenidən dalğalandırması builki cümhuriyyət bayramımıza ən böyük hədiyyə oldu. Allah qəhrəman şəhidlərimizə rəhmət eləsin.
Yaşadığımız bütün çətinliklərə rəğmən əminəm ki, bayrağımız bir daha heç vaxt enməyəcək. Böyük milli liderimiz M.Ə. Rəsulzadənin dediyi kimi həqiqət günəşi bir gün mütləq parlayacaqdır!
Bayramınız mübarək!