İctimai fəal Bəxtiyar Hacıyev
2 həftə əvvəl Ermənistanla sərhəddə gərginliklə bağlı insanlar suallar verəndə Facebookda bir məlumat yayılmağa başladı:
“Azərbaycan, Ermənistan və Rusiya nümayəndələri arasında Qaragöl şifahi razılaşmasının ilkin detalları:
Azərbaycan tərəfinin Silahlı Qüvvələri dövlət sərhədində dayanırlar. Bunun əvəzində:
1) Qarabağdakı bütün erməni silahlıları çıxarılır;
2) Qırmızıbazar – Şuşa yolu Azərbaycanın ordusunun nəzarətinə verilir;
3) Qazaxın kəndləri və Naxçıvanın Kərki kəndi erməni işğalından azad edilir;
4) Zəngəzur bölgəsindən nəqliyyat dəhlizinin açılmasına icazə verilir.
Erməni tərəfi öhdəlikləri iki həftə ərzində yerinə yetirməlidir…
Mənbə: Xəzər Hərbi Tədqiqatlar İnstitutu”
O zaman bunun dezinformasiya olduğunu demişdim, amma bir çox adama şirin yalan acı həqiqətdən üstün gəldiyinə görə 2 həftəni də gözləməyə üstünlük verdim.
Bu iki həftədə ermənilər Naxçıvana atəş açıb, əsgərimizi yaraladılar. Kəlbəcərdə qoyduqları mina təminat maşınını partlatdı, əsgərimiz şəhid oldu, yaralananlar oldu. Nə Qarabağdan silahlılar çıxarıldı, nə Qırmızıbazar-Şuşa yolu bizə qaytarıldı, nə Zəngəzur dəhlizi açıldı, nə Qazaxın kəndləri və Kərki bizə qaytarıldı.
Belə dezinformasiyalar çox olub yaxın keçmişdə. Vətəndaşlarımız haqlı olaraq “Rusiya ordusu Qarabağa girdisə, Türkiyə ordusu niyə orada deyil?” soruşanda ortaya Suriyadakı Türkiyə qoşunlarının bir videosunu atdılar ki, aaa, görmürsünüz, Türk ordusu Qarabağdadır! İnsanlarımız “ərazi bütövlüyümüz təmin olunubsa, Xankəndi barədə yazın, orada nə baş verəcək?” soruşanda “1 dekabrdan Xankəndi banklarında Azərbaycan manatı işləyəcək” dezinformasiyasını yaydılar bacardıqları qədər.
Bunu edənlər sıravi vətəndaşlar olsaydı, narahat olmazdım. Amma bu dezinformasiyalar sosial şəbəkə istifadəçilərinə, etibarlı saydığımız insanlara və qurumlara dövlətin ən üst səviyyəsindən, dövlətin təhlükəsizliyindən məsul olanlardan gəlir. Elə bilirlər ki, əhalini qısa müddət sakitləşdirmək problemi həll edəcək. Şirin yalan danışıb, camaatı yatızdırmaq uzunmüddətli acı həqiqəti görməyə mane olacaq.