Bəxtiyar Hacıyev
Demək istəyir ki, 28 may – bugünkü Azərbaycan Respublikasının varis olduğu, qurucu babalar M.Ə.Rəsulzadə, F.Xoyski, N.Yusifbəyli, Ə.Topçubaşov kimi dövlət təfəkkürlü, möhkəm iradəli, siyasi şəxsiyyət kimi formalaşmış insanların müsəlman şərqində qurduqları ilk demokratik cümhuriyyət, Azərbaycan Xalq Cümhuriyyətinin qurulduğu gündür.
Amma deyə bilmir, yola verir. Çünki o cümhuriyyətin şüarı “Bir kərə yüksələn bayraq bir daha enməz” idi, o cümhuriyyət bayraq dirəyində də korrupsiyaya yol verib, bayraqsız dövlət bayrağı meydanı tikməmişdi.
O cümhuriyyət idi ki, hökumətdə təmsil olunanlar hamısı əsl ziyalılar idi, cəmiyyətin üzünü görmədiyi, öz dilində danışa bilməyən, kiminsə qohum-əqrabası, uşaq-muşağı doldurmamışdılar hakimiyyətə.
O cümhuriyyət idi ki, onun naziri maaşla dolana bilmədiyinə görə atasından borc istəyirdi, dövlətin imkanlarından istifadə edib özünə və ailəsinə xərcləmirdi. Mühacirətdə yaşayanda da, öləndə də, öldürüləndə də xalqın malına toxunmamışdılar, adlarına siyahılarla mülklər çıxmırdı, öldürüləndə üzərlərindən sadəcə şəxsi geyimləri çıxırdı.
Başa düşür ki, o parlamentin yerində indi tumandan çıxmış və hörmətsiz deputatlar əyləşiblər, korrupsioner olmayan bir nazir də tapılmır, icra başçısı postundan yuxarılara qədər təyin etdiklərinin böyük əksəriyyəti cəmiyyətdə ən hörmətsiz adamlardır.
Ona görə də Azərbaycan Xalq Cümhuriyyətinin qurucularını da sevmir, yaranması gününü də beləcə “Respublika günü” sözləri ilə yola verir.