AXCP Rəyasət Heyətinin üzvü Fuad Qəhrəmanlı
Hazırda Belarusda yaranmış vəziyyət keçmiş Sovet məkanında demokratiyaya keçidlə bağlı yeni bir presedent yaratmaqdadır. Necə? Bundan əvvəl Ukrayna, Gürcüstan və Ermənistanda baş tutmuş demokratik dəyişikliklərdə avtoritar rejimlər xalqların iradəsi qarşısında müqavimət göstərə bilməyərək süqut etmişdilər. Ancaq Belarusda vəziyyət fərqli oldu və Lukaşenko geniş miqyaslı və çox kəskin zorakılıq hesabına aylarla davam edən xalq etirazlarını boğa bildi. Əgər əvvəlki illər olsaydı, onun bu zorakılığı və Rusiyanın himayəsi Belarusda avtoritar rejimin yaşaması üçün kifayət edərdi. Ancaq indi vəziyyət fərqlidir. Bu fərq ölkəmizə də fərqli bir gələcək vəd etdiyi üçün bizdən ötrü maraqlıdır.
✅ Bu fərq nədə ifadə olunur? Belarus nümunəsində ilk dəfə olaraq prezident seçkisinin rəsmi elan olunmuş nəticəsinə baxmayaraq, Qərbdə müxalifətin namizədi Tixanovskayaya xalqın legitim təmsilçisi kimi qəbul edildi. Hazırda Qərb dövlətləri rəhbərləri onu Belarus xalqının seçilmiş təmsilçisi kimi qəbul edərək bu ölkə ilə bağlı məsələləri onunla danışırlar. Bu eyni qaydada sabah Azərbaycanda da seçkilər saxtalaşdırılacağı təqdirdə bizim ölkəyə də tətbiq oluna biləcək bir yanaşmanın əsasının qoyulması deməkdir.
✅ Digər bir mühüm məqam, ağır sanksiyalarla Lukaşenko hakimiyyətinin yaşama qabiliyyətinin iflic edilməsidir. Dünən ABŞ, Kanada və Böyük Britaniya Lukaşenko hakimiyyətinə qarşı çox ağır sanksiyalar tətbiq etdi. Bu sanksiyalar onun hakimiyyəti üçün geri sayımın başlanması deməkdir. Bu şəraitdə Rusiya hər nə qədər istəsə belə, hər il 10 milyard dollardan artıq xərc çəkib Lukaşenkonu bəsləyə bilməz. Lukaşenko getməlidir. Daha onun güclü polisi, xəfiyyə orqanları müxalifət fəallarına qarşı nə qədər amansız olurlarsa – olsunlar, bu, bir şeyi dəyişməz. Eləcə də bənzər anologiya ilə ölkəmizdə də mitinqlərin qadağan olunması, siyasi həbslərin davam etməsi, dövlət rəhbərliyinin güzəştsiz rəftarı, güc strukturlarının siyasi və ictimai etirazlara qarşı sərt davranışları mövcud rejimin ömrünü uzatmaq üçün yetərli deyil. Əksinə, bu beynəlxalq reaksiyaları daha da sərtləşdirib iqtidar komandasının özü üçün daha təhlükəsiz bir şəraitdə uzaqlaşmaq imkanlarını məhdudlaşdırır və riskləri artırır. Güclə, zorla hakimiyyətdə qalmaq dönəmi bitmək üzrədir. Bunu anlamaq gərəkdir.
✅ Başqa bir önəmli məqam, kütləvi zorakılığa və dinc insanlara qarşı repressiyalara görə Lukaşenko ilə bağlı beynəlxalq məhkəmənin yaradılma ideyasının gündəmə gəlməsidir. Əgər, sabah İlham Əliyev və ətrafı da eyni yolu getmək həvəsinə düşərsə bu, eyni presedentin tətbiqinə yol aça bilər. Ona görə də Belarusla başlayan yeni mərhələdə iqtidarın sınırsız güc imkanları, sadiq zor aparatınıın olması, hakimiyyəti əldə saxlamaq üçün etibarlı təminat sayılmır. Əksinə, zora əl atılması labüd sonu dah da tezləşdirməyə təsir edər.
Bu şəraitdə hakimiyyət yeni çağırışların fərqində olmalı, vaxtında islahatlara gedib yumşaq keçidi təmin etmək üzərində düşünməlidir. Bu yolun alternativi yoxdur.