!الفقر في مصر مسئولية مين؟
الخميس الماضي أصدر الدكتور أحمد الطيب
شيخ الأزهر قرار عاجل بوقف إعلان المياه الملوثة بالصعيد واللي قامت به الفنانة
دلال عبد العزيز على عدد من المحطات الفضائية مع بداية شهر رمضان ،وده كان بعد
مناشدة المجلس الأعلى لتنظيم الإعلام اللي إعتبر إن الإعلان يحمل رسالة أساءت للدولة في جهودها المستمرة لتحسين
مياه الشرب اللي من المفترض إنها بتوصل لعدد من المصريين على حسب تصريحات مجلس
الإعلام.
الان مثير للسخرية:
من أول ما الإعلان بدأ يتذاع وفيه حالة
من السخرية انتابت رواد مواقع التواصل الإجتماعي بسبب الإعلام والرسالة اللي
بيحملها ، والسخرية لم تكن على الحالة اللي ظهرت في الإعلان لكن عن الدولة اللي من
الفترض إن دورها الأساسي هو رفع مستى معيشة المواطن وتلبية إحتياجاته الأساسية
واللي منها مياه شرب تصلح للشرب.
الأمر اللي وصل لمرحلة الكوميكس الساخر واللي ظهرت فيه دلال عبد العزيز فى الصورة مع السيدة الفقيرة وهى تقول "تعالى ورينا بتشربى منين.. عشان اقولك معلش" ، على الرغم من الهجوم اللي حصل على إعلان دلال عبد العزيز لكن مشيخة الأوهر قالت عنه إنه كان بدافع إنساني ووطني، وقالت كمان إن الفنانة دلال عبد العزيز لم تتقاضى أجر عليه لكن المشيخة أصدرت قرار الوقف إستجابة لطلب الأعلي للإعلام.
"يادي الإعلان اللي عمل مشكلة، معرفش كبروا الحكاية لي، زيه زي إعلانات لمؤسسات كتير في رمضان بنوصل كهربا وميه، بنعرف الناس مؤسسة مصر الخير بتقدم إيه وبتساعد حالات إنسانية إزاي." ،ده كان رد دلال عبد العزيزعلى قرار مشيخة الأزهر بوقف الإعلان المذكور .
فقراء مصر:
من سنوات قليلة وإعلانات الفقراء ولتبرع ليهم وللمستشفيات بقت منتشرة جدا على المحطات الفضائية الأمر اللي بقى أشبه بموسم لتلك الإعلانات ، في الوقت اللي نفس المحطات بتكثر فيها إعلانات الكمبوندات وأسعار الشقق الخيالية ،وعلى الرغم من أن الدولة دائما بتعلن عن نفسها نصيرة لمحدودي الدخل إلا أن نسبة الفقر في مصر أصبحت في تزايد يذكر أن نسبة الفقر العامة في مصر تقدر بـ27.3% وفقا للجهاز المركزي للتعبئة والإحصاء، وأن إقليم الصعيد يعد الأكثر فقرا داخل الدولة، حيث تبلغ نسبة الفقر إلى 50%..
