ပုပ်ရဟန်းမင်းကြီးဟာ ဒူးပြဿနာကြောင့် ဘီးတပ် ကုလားထိုင် အသုံးပြုပြီး သွားလာနေရကြောင်း သိရပါတယ်။
ပုပ်ရဟန်းမင်းကြီး ဖရန်ဆစ်ဟာ မေလ ၅ ရက်က ဘာသာရေး ခေါင်းဆောင်တွေ၊ သီလရှင်ကြီးတွေနဲ့ အစည်းအဝေးတစ်ခု ပြုလုပ်ရာမှာ ဘီးတပ် ကုလားထိုင်ပေါ် လိုက်ပါလာတာ ပထမဆုံးအကြိမ် တွေ့မြင်ခဲ့ရပါတယ်။ ရိုမန်ကက်သလစ် ခရစ်ယာန် ဘာသာရေးရဲ့ အထွဋ်အခေါင် ပုဂ္ဂိုလ်ကြီးဟာ ဒူးခေါင်း နာကျင်မှုကြောင့် လှုပ်ရှား သွားလာရာမှာ အခက်အခဲတွေ ရှိနေတယ်လို့ ဆိုပါတယ်။
ရောမမြို့မှာ တက်ရောက်ခဲ့တဲ့ အစည်းအဝေးကတော့ ပုပ်ရဟန်းမင်းကြီးကို ဘီးတပ်ကုလားထိုင်ပေါ်မှာ ပထမဆုံးအကြိမ် လူသိရှင်ကြား တွေ့မြင်ရတာလည်း ဖြစ်ပါတယ်။ အသက် ၈၅ နှစ် ရှိပြီဖြစ်တဲ့ ပုပ်ရဟန်းမင်းကြီးဟာ ညာဖက်ဒူးက အရွတ်တွေမှာ နာကျင်တာကို လပေါင်းအတော်ကြာ ခံစားနေခဲ့ရကြောင်း ဗာတီကန်နန်းတော် တာဝန်ရှိသူတွေက ပြောပါတယ်။
ပုပ်ရဟန်းမင်းကြီး ကိုယ်တိုင်ကလည်း နာကျင်မှု သက်သာအောင် အကိုက်အခဲ ပျောက်ဆေးတွေပါ ထိုးနေရကြောင်း ထုတ်ပြောဖူးပါတယ်။ ဒါပေမဲ့ အခြေအနေက တိုးတက်မလာဘဲ လမ်းတောင် မလျှောက်နိုင်အောင် ဖြစ်လာလို့ ဘီးတပ် ကုလားထိုင် အသုံးပြုလာရတာပါ။
အာဂျင်တီးနား နိုင်ငံသား ဘုန်းတော်ကြီး ဖရန်ဆစ်ဟာ ၂၀၁၃ နှစ်ဆန်းပိုင်းလောက်က စပြီး ပုပ်ရဟန်းမင်း အရိုက်အရာကို ဆက်ခံခဲ့ပါတယ်။ သူဟာ ၂၀၁၇၊ နှစ်ကုန်ပိုင်းက မြန်မာနိုင်ငံကို ရောက်ရှိခဲ့ပြီး နိုင်ငံသမိုင်းတလျှောက် ပထမဆုံး ကြွရောက်တဲ့ ပုပ်ရဟန်းမင်းအဖြစ် မှတ်တမ်း ဝင်ခဲ့ပါတယ်။
